Хүний нэр урт, богино, цээрлэсэн, хүндэтгэсэн, өхөөрдсөн нэрс байхаас эдүгээ цагт Монгол улсын хүн амын бүртгэлээс харвал хамгийн урт нэртэй бяцхан иргэн нь Хэнтий аймгийн харьяат Мятрашгүймонголжингоо хэмээх охин байдаг бол Сэлэнгэ аймагт Найманзууннандинцэцэг, Говьсүмбэрт Энхтөгөлдөрбаясгалан, Төв аймагт Гүрсоронзонгомбосүрэнболд нэртэй хөвгүүд охид бий аж.

Мөнтүүнчлэн Лувсандэнзинпэлжинжигмэ, Гурвындаваатотгонбаатар, Гурванхангайншатарманлай, Бурваабадрабадмахорлоо гэсэн онцгой урт нэртнүүдээс гадна Цасаншуургыншинэжил, Ёотон, Пулемёт, Хөсрий, Жижигзургаа, Бариул, Пропуск, Окоп, Үсрээ, Гөлчгий, Галтогоо, Магзин, Муунохой, Өчүүхэнтуяа гэх мэт сонин содон нэртэй хүмүүс ч цөөнгүй байдаг.

Дээхэн үед Мэлсчой гэсэн нэртэй хүн байсан бөгөөд тэр нь Маркс, Энгельс, Ленин, Сталин, Чойбалсан гэсэн нэрийн эхний үсгийг авч нэрлэсэн байна. Харин хамгийн түгээмэл давхардсан нэр нь Оюунчимэг, Бат-Эрдэнэ, Отгонбаатар, Алтанцэцэг гэсэн нэртнүүд байдаг байна.