Сүүлийн үед манай эдийн засаг тогтвортой хөгжлийн замд орлоо гэж Засгийн газрын тэргүүнээс аваад Ерөнхийлөгч болон гадна дотны эдийн засагч, мэргэжилтнүүд хэн хэнгүй ярих болсон. Хэвлэл мэдээллийн хэрэгслээр ч ингэж тасралтгүй сурталчлах шинжтэй. Гэтэл өнгөц харахад эдийн засаг өсөлт байгаа мэт боловч энэ нь хэврэг, өсөлтөөс уналтад шилжихэд бэлэн байдалтай байна. Яагаад гэвэл эдийн засагт тогтвортой үйлчлэх бүтцийн дэвшилтэт өөрчлөлт гарч эхлээгүй байна. Монголын эдийн засгийн бодит сектор нь уул уурхайн олборлон баяжуулах салбар, мал аж ахуй гэсэн хоёрхон тулгуур дээр тогтож байна. Гэтэл энэ хоёр салбар хоёулаа эрсдлийн байдалд байна.
Дээрх дүгнэлтийг аль нэг хэвлэлийн байгууллага, хэн нэгэн ажиглагч бус чухам зах зээлийн нийгэмд шилжих үед Монгол орныг авч гарахын тулд хонгилын үзүүрт гэрэл сүүмийлгэж байсан Ерөнхий сайд асан П.Жасрай хийж байна.
Энэ зуун мэдлэгт тулгуурласан эдийн засгийг эрхэмлэн биотехнологи, нанотехнологи зэрэг дэвшилтэт хослолуудыг тэргүүнд тавьж аж үйлдвэрийн гурав дахь хувьсгалыг эхлүүлээд байхад монголчууд бид хэдэн малаа эргүүлэн, ганц нэг орд газраасаа зэс, нүүрс олборлон, түүнийгээ яах вэ хэмээн эцэс, төгсгөлгүй маргалдаж сууна. Гэтэл хөгжил гэдэг хэрэглээ биш, хүний өөрийн нь хөгжил, үүнд анхаарлаа төвлөрүүлэн, мэдлэгт тулгуурласан эдийн засагт шилжих анхны алхмыг яаралтай эхлэх цаг ирлээ хэмээн өвгөн Ерөнхий сайд захиж байна. Үүгээр Нээлттэй нийгэм хүрээлэнгээс зохион явуулж байгаа "Монгол Улсын Ерөнхий сайдууд ярьж байна" цуврал хэлэлцүүлэг өндөрлөж байгаа аж.
Б.Болд