Зүүн Азийн Хөлбөмбөгийн Холбооны 46 дахь Гүйцэтгэх Хорооны хурал Ардчилсан Солонгос улсад энэ сарын 19-ны өдөр болж өндөрлөлөө.

Зүүн Азийн 10 орныг нэгтгэсэн тус холбооны хуралд МХБХ-ны Ерөнхийлөгч А.Ганбаатар оролцлоо. Уг хурлаар МХБХ-ны ерөнхийлөгч А.Ганбаатарыг Зүүн Азийн Хөлбөмбөгийн Холбооны Гүйцэтгэх Хорооны гишүүнээр сонгох тухай хэлэлцсэн байна. 

Ингээд санал хураалтын эцэст МХБХ-ны ерөнхийлөгч А.Ганбаатар 100 хувийн саналаар Зүүн Азийн Хөлбөмбөгийн Холбооны Гүйцэтгэх хорооны гишүүн болсон байна. Мөн тус хурлын үеэр МХБХ-ны ерөнхийлөгч А.Ганбаатар БНАСАУ-ын Хөлбөмбөгийн Холбооны ерөнхийлөгч Ри Жон Мутай уулзан хоёр улсын шигшээ багууд харилцан нөхөрсөг тоглолт хийх, БНАСАУ-ын мэргэжлийн тоглогчдыг Монгол улсад тоглуулах болон Монгол улсаас шалгарсан хүүхэд багачуудыг Ардчилсан Солонгос улсын хөлбөмбөгийн бэлтгэлийн төвд хамруулах зэрэг олон асуудлыг ярилцсан байна.

Нөгөөтэйгүүр, БНАСАУ-ын Хөлбөмбөгийн холбооны ерөнхийлөгч Ри Жон Мугийн хувьд Монголын Хөл Бөмбөгийн Холбоотой хамтран ажиллахад бэлэн байгаагаа илэрхийлжээ.

Эх сурвалж: Монголын Хөл Бөмбөгийн Холбоо