Манай улсад байгаль орчинтой холбоотой бодлого, хөтөлбөр 30 орчим гарсан хэдий ч түүний хэрэгжилт хангалтгүй, хэрэгжүүлэх механизм оновчтой бус байна.

Үүний нэг жишээ Улаанбаатар хотын агаарын бохирдлын асуудал болоод байна. Өвөл утаа, хавар хөрсний бохирдол, Туул голын ширгэлт, бохирдолт гэж ярих төдийгөөр хязгаарлаж үр дүн, үр ашигтай ажил хийгдэхгүй байна.

Энэ бүхний хариуцлагыг Засгийн газар хүлээх ёстой. Иймд бид Засгийн газраас агаарын бохирдол, уур амьсгалын өөрчлөлтийн сөрөг үр дагаврыг багасгахыг өнөөдөр шаардаж байна хэмээн Тусгаар тогтнолын талбайгаас Чингисийн талбай хүртэл “Уур амьсгалын өөрчлөлт бидний амьдралд- масктай марш” тайван жагсаал зохион байгуулагчид хэлж байна.

Тайван жагсаалд Улаанбаатар хотын ерөнхий боловсролын арван сургуулийн ахлах ангийн 500 гаруй сурагчид, захын хорооллын иргэд, иргэний нийгмийн байгууллагууд оролцсон юм.

Энэхүү хөдөлгөөн нь улс орнуудын Засгийн газрыг уур амьсгалын өөрчлөлтийн нөлөөллийг багасгахын тулд Олон улсын гэрээнд гарын үсгээ зурж, түүний мөрөөр бодит үйл ажиллагааг нэн шуурхай авахыг шаардах зорилготой.

Монгол Улсын Засгийн газраас “Уур амьсгалын өөрчлөлтийн Үндэсний хөтөлбөр”-ийг 2011 онд баталж, 2016 он гэхэд эхний үе шатны хэрэгжилтийг дүгнэхэд ганц жил үлдсэн байна. Гэвч энэ хугацаанд хийсэн дорвитой ажил байхгүй байгааг тэд онцолж байлаа.

“Уур амьсгалын өөрчлөлтийг шийдвэрлэх болон ядуурал, тэгш бус байдлыг арилгах нь нэг зоосны хоёр тал юм. Бид уур амьсгалын өөрчлөлтийн нөлөөллийг багасгахгүйгээр тогтвортой хөгжлийг авчирч чадахгүй. Ядуурал, тэгш бус байдлыг зогсоож байж уур амьсгалын өөрчлөлтийн нөлөөлөл багасна. Улс орнуудын Засгийн газар тэгш бус байдлыг арилгах, ядуурлыг бууруулах, шинээр батлагдсан зорилтуудыг бүрэн хэрэгжүүлэхийг үнэхээр хүсч байгаа бол эрчим хүчний эх үүсвэрээ сэргээгдэх эрчим хүч рүү 100 хувь шилжүүлэх ёстой.

Уур амьсгалын өөрчлөлттэй тэмцэх дэлхий нийтээрээ баримтлах бодлогыг баталснаар хөгжиж буй болон ядуу буурай улс орнуудад нүүрс түлснээс үүсэх агаарын бохирдлыг бууруулахад, эмзэг бүлгийн иргэдэд уур амьсгалын өөрчлөлттэй тэмцэх, дасан зохицоход бодит тусламж болно.

Уур амьсгалын өөрчлөлттэй тэмцэх цаг болж, хүн төрөлхтнийг амар тайван, аюулгүй амьдрах нөхцлийг бүрдүүлэх цаг болсныг илтгэж байна. Уур амьсгалын өөрчлөлт нь бидний амьдралд нөлөөлж байна. Иймд уур амьсгалын өөрчлөлтийн сөрөг үр дагаврыг бууруулахын төлөө Засгийн газар дорвитой арга хэмжээ авах ёстой.
Уур амьсгалын өөрчлөлтийн сөрөг үр дагавар малчид, тариаланчид, ногоочид болон эмзэг бүлгийн иргэдэд хамгийн хүндээр тусч байна. Байгалийн гамшиг, зуд, ган, үер, цөлжилт, усны нөөцийн хомсдол зэрэг нь бүгд уур амьсгалын өөрчлөлтийн үр дагавар юм” гэдгийг иргэний нийгмийн байгууллагууд санал нэгтэйгээр хэлж байна.

Тогтвортой хөгжлийн зорилтуудыг хэрэгжүүлэхэд дэлхийн улс орнуудын иргэний нийгмийн байгууллагууд, иргэдийн оролцоог нэмэгдүүлэхийн төлөө Action/2015 нь 2000 гаруй байгууллага, сүлжээ, 150 орны эвслээс бүрдсэн дэлхийн хамгийн том иргэний нийгмийн кампанит ажлыг зохион байгуулж, уур амьсгалын өөрчлөлтийн эсрэг аян өрнүүлж байгаа аж.

Монголын иргэний нийгмийн байгууллагууд уур амьсгалын өөрчлөлт, ядуурал, тэгш бус байдлын эсрэг тэмцэлд ахиц дэвшил гаргахын төлөө энэ хөдөлгөөнд нэгдэж байгаа юм.

Уур амьсгалын өөрчлөлттэй тэмцэхийн тулд 150 гаруй оронд 2000 гаруй үйл ажиллагаа зохион байгуулж байна.

Манай улсад дээрх хөдөлгөөний өрнүүлж байгаа бол бусад улсад,

• Уганда улсын Кампала хотод Ромын папын Африк тивийн анхны айлчлалын үеэр мянга мянган иргэн цугларч, уур амьсгалын өөрчлөлтийн нөлөөллийг багасгах шаардлагыг Засгийн газартаа хүргүүлж байна.
• Бразил Улсын Сан Пауло хотод уур амьсгалын өөрчлөлтийн асуудлыг шийдэхийг шаардсан, мөн өөрсдийн боловсруулсан шийдлээ танилцуулах иргэдийн цуглаан болно.
• Энэтхэг Улсын 7 хотод дэлхийн уур амьсгалын өөрчлөлтийн эсрэг олон нийтийн алхалт, йога, дугуйн уралдаан, жагсаал, цуглаан, зохион байгуулах юм.
• Франц Улсын Парис хотод халдлагын улмаас хөдөлгөөн, цуглаан зохион байгуулахыг хориглосон учир идэвхтнүүд нь бусад орны иргэдийг Бейрут, Багдад болон Кана хотуудын оршин суугчдын өмнөөс цуглаан зохион байгуулахыг уриалж байна.
  
  Гэрэл зургийг Б.Бямба-Очир / MPA.mn