Энэ оны наймдугаар сарын 20-28-ны өдрүүдэд Хичээлийн шинэ жил эхлэхтэй холбогдуулан Нийслэл, дүүргийн мэргэжлийн хяналтын газраас сургууль цэцэрлэгүүдэд хийсэн шалгалтын үр дүнд хувийн өмчийн дөрвөн сургуулийн тусгай зөвшөөрлийг цуцлах саналыг Нийслэлийн Боловсролын газарт хүргүүлсэн талаар НМХГ-ын Эрүүл мэнд, боловсрол, соёлын хяналтын хэлтсийн дарга Д.Цэнд-Аюуш мэдээллээ.

Тухайлбал, Чингэлтэй дүүрэгт үйл ажиллагаа явуулдаг "Чин-Хур", "Цахим эрин", Сүхбаатар дүүргийн "Шонхор", "ABC" сургуулиудыг эрүүл ахуйн шаардлага хангаагүй, боловсролын стандартын шаардлага хангаагүй гэх зэрэг шалтгаанаар тусгай эрхийг нь цуцалсан боловч одоог хүртэл үйл ажиллагааг явуулж байна гэв. Иймд Нийслэлийн мэргэжлийн хяналтын газраас эцэг эхчүүдийг хүүхдээ битгий сургаач гэж анхааруулж байна.

Нийслэл, дүүргийн мэргэжлийн хяналтын газраас ЕБС, цэцэрлэг, "Үдийн цай" хөтөлбөр, сургуулийн оюутны байрны эрүүл ахуйн нөхцөл, барилгын засвар үйлчилгээний явц, засварын чанар, багшлах боловсон хүчин, ном сурах бичгийн хангамжийн байдалд урьдчилан сэргийлэх хяналт шалгалт хийжээ.

Шалгалтад дараах байгууллагуудыг хамруулжээ. Үүнд:

• Ерөнхий боловсролын 40 сургууль
• Сургуулийн өмнөх насны хүүхдийн 39 байгууллага
• Цэцэрлэгүүдийг хүнсээр хангах үйлдвэрийн 4 газар
• Оюутны 8 дотуур байр
• Үдийн цай бэлтгэн нийлүүлэх 28 аж ахуй нэгж багтжээ.

Шалгалтаар дараах сургууль цэцэрлэгүүд ашиглалтын шаардлага хангахгүй барилгад үйл ажиллагаа явуулж байна.

• Баянгол дүүргийн 19 дүгээр сургуулийн хичээлийн 1-р байр
• Баянзүрх дүүргийн 21-р цэцэрлэг, 14-р сургууль
• Хан-Уул дүүргийн 75-р сургууль, 72-р цэцэрлэгийн ашиглалтын шаардлага хангахгүй
• Чингэлтэй дүүргийн 33 -р цэцэрлэгийн барилгыг цаашид ашиглах боломжгүй гэсэн дүгнэлт хийжээ.
• Баянгол дүүргийн 73-р сургуулийн хичээлийн байрыг нурааснаас 51-р сургуулийн хичээлийн байранд сургалтын үйл ажиллагаа явуулж, гурван ээлжээр хичээллэж байна.

Нийслэлийн хэмжээнд суурь боловсролын цөм хөтөлбөрийн хүрээнд шинэчлэгдэн гарч буй сурах бичгүүдийг тараагаагүй, сурах бичийн хангалт, татан авалтыг бүрэн хийгээгүй байснаас гадна дараах сургуулиудад мэргэжлийн бус хүн ажиллаж байна.

Шалгалтын явцад нийт 319 зөрчил илрүүлж, 62 хувийг шалгалтын явцад арилгуулж, 10 байгууллага, хоёр албан тушаалтанд 1,980 мянга төгрөгийн торгууль ногдуулжээ.

Мөн элсэгч, суралцагчдаас хууль бус төлбөр хураамж авахгүй байх талаар шалгалтад хамрагдсан байгууллагуудын удирдах ажилнуудад анхааруулжээ.