Энэ сарын 12-нд дэлхийд нээлтээ хийх "Грейгийн амьдралын 50 сүүдэр" Азийн зах зээлийг алдлаа хэмээн ТАСС агентлаг мэдээлж байна. Учир нь Малайзын эрх баригчид тус улс орон даяар театр, зурагтаар дээрх киног гаргахыг хоригложээ.

“Грейгийн амьдралын 50 сүүдэр” Малайзын кино цензурын хорооноос эрх шүүмжлэлтэй тулгарсан байна. Энэ талаар “Тус киноны хуулбарыг үзээд Малайзын кино цензурын хорооноос улсын нутаг дэвсгэрт энэхүү киног гаргахыг бүрэн хориглосон шийдвэр гаргасан. Учир нь киноны агууламж нь садар самууныг сурталчилсан өнгө аястай байна” хэмээн тус хорооны дарга Абдул Халим Абдул Хамид хэлжээ.

Малайзын кино цензурын хороо нь тус улсын Дотоод хэргийн яаманд харьяалагддаг бөгөөд тус хорооноос гаргахыг хориглосон киноны жагсаалтууд Дотоод хэргийн яамны хар жагсаалтад мөн бүртгэгддэг байна.

Малайзын Үндсэн хуулиар гаргахыг бүрэн хориглосон, хар жагсаалтад багтсан киног мөнгөөр болон үнэ төлбөргүй тараах, хадгалах, үзэх нь хориглогдсон байдаг аж. Үүнийг зөрчсөн тохиолдолд их хэмжээний торгууль оноох эсвэл таван жил хүртэл шоронд хорих ял оноодог байна.

“Грейгийн амьдралын 50 сүүдэр” Малайзад гарахгүй болсныг United International Pictures кино студийн албан ёсны төлөөлөгч баталгаажуулсан юм. 

Дашрамд сонирхуулахад 2011 онд бичигдсан зохиолч Э. Л. Жеймсийн “Грейгийн амьдралын 50 сүүдэр” роман садомазохист хандлагатай тэрбумтан Кристиан Грей болон Уран зохиолын ангийн оюутан Анастасия Стил нарын харилцааны талаар өгүүлдэг юм.

Тус ном гарсан даруйдаа АНУ, Их Британид бестселлер болж, улмаар дэлхийн 37 улсад 30 гаруй сая хувь борлогдсон байна. Э.Л.Жеймс 2013 онд дэлхийн хамгийн ашиг орлоготой зохиолчоор шалгарчээ.

Эх сурвалж: ИТАР ТАСС