УИХ-ын нэгдсэн чуулганы үдээс өмнөх хуралдаанаар Олон улсын валютын сангийн ерөнхий хэлэлцээрт оруулах нэмэлт, өөрчлөлтийг хүлээн зөвшөөрч, соёрхон батлах тухай хуулийн төслийг хэлэлцлээ.

ОУВС-гаас Монгол Улсын зээлжих тусгай эрх 51.1 сая доллар байгаа бөгөөд үүнийг 72.3 сая доллар болгож өөрчлөхөөр уг хуулийн төсөлд тусгажээ. Тус сангийн гишүүн дэлхийн 170 гаруй орноос 80 хувь нь энэ жишгээр зээлжих квотоо өсгөсөн байна. Манай улсын хувьд энэ асуудлыг 2010 онд тавьсан ч одоо хэр нь шийдэгдээгүй байгаа аж.

“Квот өсгөсний гол давуу тал эдийн засаг хүндэрсэн үед тус сангаас дэмжлэг авах эрхээ илүү нэмэгдүүлж буй хэрэг. Сангийн гишүүн орнуудын 80 хувь нь мөнгөө төлөөд, квотоо өсгөсөн. Монгол Улс квотоо өсгөхийн тулд 8 сая доллар төлөх шаардлага гарна. Үүнийг Улсын төсөвт тусгах шаардлагатай” гэж Сангийн яамны Төрийн нарийн бичгийн дарга Х.Ганцогт УИХ-ын гишүүдэд тайлбарлав.

Улс орнууд бүгд зээлжих тусгай эрхээ нэмэгдүүлж байгаа. Түүнтэй адилаар Монгол Улс өөрийн эрхийг нэмэгдүүлэх хэрэгтэй гэж үзэж холбогдох хуульд энэ өөрчлөлтийг оруулж байгаа юм. ОУВС-гийн гишүүнчлэлээс гарсан Европын орон байхгүй бөгөөд Монгол Улс өнөөдрийн байдлаар тус сангаас ямар нэг дэмжлэг аваагүй. Хэрэв дэмжлэг авбал ОУВС-гаас тодорхой хэмжээний шаардлага тавьдаг байна.

Улс орнуудын жишгээр зээлжих тусгай эрхийг нэмэгдүүлэх шаардлагатай, эсэх тухай санал хураалт явуулахад хуралдаанд оролцсон гишүүдийн 79.3 хувь нь дэмжсэнээр Олон улсын валютын сангийн ерөнхий хэлэлцээрт оруулах нэмэлт, өөрчлөлтийг хүлээн зөвшөөрч, соёрхон батлах тухай хуулийн төслийг баталлаа.