Хөл бөмбөгийн дэлхийн аварга шалгаруулах тэмцээний үеэр интернетээр дамжуулан луйвар хийх оролдлого улам идэвхжинэ гэж мэргэжилтнүүд анхааруулж эхэлжээ. Тамирчид, хөгжөөн дэмжигчдийн нэгэн адил луйварчид ч бэлтгэл ажлаа базааж байгаа гэнэ. Тэд нэр хүнд бүхий спортын тэмцээнийг байнга ашигласаар ирсэн юм.

“Касперскийн лаборатори”-ийн мэргэжилтнүүдийн онцолсноор тэд цахим гарын үсэг, үйлчилгээний сайтуудын мэдээллийн санг эвдэн, тасалбар худалдаалах ажиллагааг хуурамчаар зохион байгуулах бололтой. Луйварчид мэргэжлийн өндөр түвшний сайтууд нээж эхэлсэн бөгөөд “Касперскийн лаборатори” л гэхэд өдөрт 50 орчим ийм сайтын үйл ажиллагааг зогсоодог байна.

Үүнээс гадна хэрэглэгчдэд хөл бөмбөгийн тэмцээний тасалбар хожсон талаар хуурамч захидал илгээдэг байна. Үүнийгээ авахын тулд тодорхой хэмжээний мөнгө төлөх ёстой юм байна. Мэдээж ямар ч тасалбар байхгүй. Ийм маягаар луйвар хийх явдал түгээмэл болжээ.