Монголд хөрөнгө оруулалтын сангийн эрх зүйн зохицуулалтын орчин бий болсноос хойш хөрөнгийн бирж дээр нэгж эрх нь арилжигдаж буй хоёр сан байна. Сан нь өөрөө манай шиг хөгжиж буй хөрөнгийн зах зээлд хөрвөх чадварын болон хөрөнгө оруулалтын чиг хандлагын манлайлал болох ёстой.

Дээр дурдсан үйл ажиллагаа явуулж буй хоёр сангийн нэг бол [MSE:MFG] Мандал ирээдүйн өсөлт Хамтын хаалттай хөрөнгө оруулалтын сан юм. Тус сан нь 2021 онд байгуулагдаж, хөрөнгө оруулагчдаас 50 тэрбум төгрөгийн хөрөнгө оруулалт босгосныг бүгд мэднэ.

Уг сангийн үйл ажиллагаа явуулах хугацаа 2031 онд дуусаж, хөрөнгө болон үр ашгаа нэгж эрх эзэмшигчдэдээ хуваарилах дүрэмтэй.

Тоон үзүүлэлтийг харвал, 2023 оны 2-р улирлын байдлаар сангийн цэвэр хөрөнгө 56.0 тэрбум төгрөгт хүрч, 1,000₮-ийн үнэтэй нэгж эрхийн үнэ цэн 1,120.62₮ болсон гүйцэтгэлтэй байна.

Хөрөнгө оруулалтын багцын хувьд 2021 оноос хойш бүтцэд хурдацтай өөрчлөлт гарчээ. Үүнд, манай улсдаа л өндөр өгөөж олох боломжтой бондын зах зээлд оруулсан хөрөнгө оруулалт багцын 44% болж нэмэгдсэн бол хувьцааны зах зээл 30.6% болж өсжээ.

Гэхдээ одоогоор зохицуулалтын орчинд буй хөрөнгө оруулалтын хувь хэмжээний хязгаарлалтууд нь сангийн боломжууд, зорилгод нөлөөлж байгаа нь эргэлзээгүй. Уг асуудлыг шийдвэрлэхээр зохицуулах байгууллагуудтай хамтран ажиллаж байгаа талаар саяхан сангийн удирдлагын зүгээс мэдэгдэж байв.

Харин [MSE:MFG] Мандал ирээдүйн өсөлт Хамтын ХОС-нд хөрөнгө оруулсан нэгж эрх эзэмшигчдийн хөдөлгөөнийг харвал тогтвортой бөгөөд хандлага эерэг байгааг харж болохоор байна.

Гэхдээ тэдэнд хийх ажил их бий.

Эх сурвалж: Marketinfo.mn