Монгол-Япон улсын арьсан урлагийн уран бүтээлчдийн хамтарсан үзэсгэлэн наймдугаар сарын 15-20-ны өдрүүдэд  "Монгол арт" галерейн үзэсгэлэнгийн танхимд болно. 

Монгол-Япон улсын хооронд соёлын харилцаа тогтоосны 50 жилийн ойд зориулсан уг үзэсгэлэнгээр хоёр орны соёлын харилцааг арьсан урлагаар дамжуулан олон нийтэд сурталчлах, туршлага солилцох, олон улсын арьсан урлагийн үзэсгэлэнг цаашид зохион байгуулах зорилготой. 

Үзэсгэлэнд 43 уран бүтээлчийн 100 гаруй уран бүтээлийг дэлгэх бөгөөд Монголоос 33 уран бүтээлчдийн 72 уран бүтээл, Японы 10 уран бүтээлчдийн 30-аад уран бүтээлийг үзэгчдийн хүртээл болгох аж. 

Үзэсгэлэнд ханын зураг, хөөмөл, уламжлалт арьсан сүлжмэл зангилаан аргаар хийсэн баримал , арьсан баримал, арьсан хүүхэлдэй, холимог техник зэрэг олон аргаар урласан бүтээлүүдийг дэлгэх юм байна. 

Уг үзэсгэлэнгийн үеэр Япон болон Хятадын арьсан урлагийн мастер уран бүтээлч, багш Honghao Cai-гийн арьсаар хагас товгор амьтан бүтээх нэг өдрийн сургалтыг наймдугаар сарын 19-ний 10:00-17:00 цагийн хооронд зохион байгуулна. 

Японы Арьсан урлагийн нийгэмлэгээс дөрөв дэх жилдээ зохион байгуулсан “Олон улсын арьсан урлагийн үзэсгэлэн” энэ оны зургаадугаар сарын 28-наас долоодугаар сарын 2-ны өдрүүдэд Токио хотноо болжээ. Тус үзэсгэлэнд Монголын арьсан урлагийн “Хүрэл буга” нийгэмлэгийн уран бүтээлчид амжилттай оролцож, Арьсан зургийн төрөлд Н.Мөнхтуул тэргүүн байр, Арьсан баримлын төрөлд Э.Бямбабаяр дэд байр, Чимэглэх урлагийн төрөлд Г.Баттөр III-р байр тус тус эзэлжээ.