Хүнс, хөдөө аж ахуй, хөнгөн үйлдвэрийн сайд М.Бадамсүрэн Дундговь аймгийн Эрдэнэдалай сумын иргэдтэй уулзжээ. 

ХХААХҮ-ийн сайд М.Бадамсүрэн “Салбарын бодлогыг Бүсчилсэн хөгжлийн үзэл баримтлалтай уялдуулан, орон нутгийн хөгжлийг дэмжин ажиллахыг зорьж байна. Үүний нэг нь “Орон нутгийн хөгжлийн төв”. Эхний ээлжид Эрдэнэдалай суманд хувийн хэвшилд тулгуурлан жишиг хэлбэрээр хэрэгжүүлнэ. 

Уг төв нь хөрөнгө оруулалт, хөнгөлөлттэй зээл, бизнесийн зөвлөх үйлчилгээг нэг цонхоор үзүүлнэ. Трактор түрээсийн үйлчилгээ, мал үржлийн нэгж, мал эмнэлгийн хүйтэн хэлхээ, бага оврын тэжээлийн үйлдвэр зэргийг байгуулна” гэв. 

Монгол Улсын Бүсчилсэн хөгжлийн үзэл баримтлалын хүрээнд 21 аймгийн төв, 70 суманд Сум дундын хөгжлийн төв буюу Орон нутгийн хөгжлийн төв байгуулахаар тусгасны нэг нь Эрдэнэдалай сум юм.

Эрдэнэдалай сум 1200 гаруй малчин өрхтэй, 2025 оны мал тооллогын дүнгээр улсын хэмжээнд хоёрдугаарт бичигдсэн, хөдөө аж ахуйн үйлдвэрлэлд суурилсан эдийн засагтай. 

Иргэд  хөдөөг хөгжүүлж, малчдыг дэмжих бодлого болох “Орон нутгийн хөгжлийн төв төсөл”-ийг манлайлан хэрэгжүүлэхээ илэрхийлж байв. 

Уулзалтад оролцогчдын зүгээс тэмээний аж ахуй, ингэний фермүүдийн үйл ажиллагааг хөгжүүлэхэд дэмжлэг үзүүлэх,  малчдыг гадаадад туршлага судлуулах, мал эмнэлгийн салбарт залуу боловсон хүчин бэлтгэх, монгол адууны удмын санг хадгалах, улсын хэмжээнд арьс шир, түүхий эд боловсруулах үйлдвэрүүдтэй болох, гүний худаг гаргах, хүлэмжийн аж ахуй хөгжүүлэх, ноолуурын үнэ тогтвортой, өсөлттэй байлгах зэрэг санал хүсэлтээ уламжилжээ.