Эдийн засгийн бодит өсөлт гэдэг нь үнийн өсөлтийг (инфляцыг) хассан, өмнөх оноос илүү их бараа, үйлчилгээ үйлдвэрлэснийг илэрхийлдэг өсөлт юм.

“Оюу толгой” үйлдвэрийн эдийн засгийн өсөлтөд үзүүлсэн нөлөөг тооцохдоо нийт бодит өсөлтийг, “Оюу толгой” байхгүй” гэсэн нөхцөлийн загварчилсан өсөлттэй харьцуулж, гарсан зөрүүгээр тооцжээ.  

Монголын эдийн засгийн өсөлт 2011 онд 17.3 хувьд хүрч, дэлхийд эдийн засгийн өсөлтөөрөө тэргүүлэхэд уг өсөлтийн 13.5 хувг “Оюу толгой”  дангаараа бий болгожээ. “Оюу толгой” байгаагүй бол эдийн засгийн өсөлт тухайн онд 3.8 хувь болох байжээ. 

Дэлхийн зах зээл дээрх уул уурхайн түүхий эдийн үнэ, эрэлт буурч, макро эдийн засгийн, түүн дотроо төсөв санхүүгийн тогтворгүй байдал үүсэж, өсөлт суларсан 2016 онд “Оюу толгой” -н гүний уурхайн хөрөнгө оруулалтыг шийдсэн. Бүтээн байгуулалтыг эхлүүлснээр эдийн засгийн уналтыг сөрж, бууралт бус өсөлтийг бий болгожээ.  

Тухайн онд “Оюу толгой” хөрөнгө оруулаагүй бол эдийн засаг 1.5%-ийн өсөлттэй байх бус эдийн засаг 21.2%-аар буурах байжээ. Уул уурхайн түүхий эдийн үнэ сэргэсэн, гүний уурхайн бүтээн байгуулалт эрчимжсэнээр 2018 онд “Оюу толгой” өсөлтийн хурдасгуурын үүргээ дахин гүйцэтгэсэн. 

Гүний уурхай барих ажил  2022 онд дуусаж, 2023 онд гүний уурхайн олборлолтыг эхлүүлснээр “Оюу толгой”эдийн засгийн өсөлтөд тогтвортой хувь нэмрээ оруулах нөхцөл бүрджээ. 

Эх сурвалж: MMCG, "Монгол Улсын эдийн засаг, нийгэмд “Оюутолгой” ХХК-ийн оруулж буй хувь нэмэр судалгаа"-наас