Монгол Улсын Засгийн газар 2015 оны 11 дүгээр сарын 16-ны өдөр Хоол тэжээлийн талаарх хүн амын эрүүл мэндийн боловсролыг дээшлүүлэх замаар иргэдийг эрүүл, аюулгүй хүнсээр хангаж, хоол тэжээлээс хамааралтай өвчин, эмгэгийг бууруулах зорилго бүхий "Хүн амын хоол тэжээл" үндэсний хөтөлбөр баталсан.

Гэвч үүнээс хойш жилийн хугацаа өнгөрсөн ч үндэсний хэмжээний хөтөлбөрийн хүрээнд хийгдсэн ажил алга гэдгийг өнгөрсөн Баасан гарагт болсон уулзалтын үеэр хэллээ.

Хөтөлбөр батлагдсанаас хойш аймаг, орон нутагт хөтөлбөр хэрэгжүүлэх салбар зөвлөл байгуулагдаагүй, аймаг, орон нутаг хөгжүүлэх сангийн хөрөнгөөр үйл ажиллагаа хийгдээгүй, асуудал хариуцсан мэргэжилтний төлөвлөгөөнд тусгагдаагүй байгаа нь хөтөлбөр хэрэгжиж эхлээгүй болохыг харуулж байгаа аж.

Эрүүл мэндийн яам, Нийгмийн эрүүл мэндийн хүрээлэн, НҮБ-ын Хүүхдийн сан хамтран жилийн өмнө батлагдсан "Хүн амын хоол тэжээл" үндэсний хөтөлбөрийг танилцуулах уулзалтыг энэ сарын 2-нд зохион байгуулсан.

Уулзалтад 21 аймгийн эрүүл мэндийн газрын мэргэжилтэн, засаг даргын тамгын газрын мэргэжилтэн, дарга нарт болон салбар бүрийн яамдын төлөөлөл оролцсон юм.

Жилийн өмнө баталсан үндэсний хөтөлбөр хэрэгжиж эхлээгүй байгаа тул цаашид хоол тэжээлийн шимт бодис, аминдэм, эрдэс бодисын найрлага, аюулгүй байдалд илүү анхаарч, "Эрүүл хүнс" ойлголтыг хүн амд хүргэж, хэрэглээг нэмэгдүүлэх нь чухал байгаа энэ үеэр ЭМЯ-ны дэд сайд Л.Бямбасүрэн онцоллоо.