“Улаанбаатар марафон-2026” олон улсын гүйлт 2026 оны тавдугаар сарын 23-ны өдөр зохион байгуулагдана. Одоо гүйлт эхлэхэд ердөө гурван өдөр үлдлээ.

Улаанбаатар марафоны зохион байгуулагчид мэдээлэл өгч байна.

46000 гаруй хүн бүртгүүлсэн ба 5 км-т 23 мянга гаруй гүйгчид бүртгүүлсэн. МУИС-ийн 1-урдаас гараанаас гаргаж сансрын туннелээр гарч баруун эргээд зүүн дөрвөн зам, Энхтайваны өргөн чөлөөгөөр барианд орохоор шинэчилж зохион байгуулсан.

Гарааны цаг дараах байдлаар байна.

• 42.195 км — 07:00
• 21.095 км — 08:30
• 10 км — 08:30
• 5 км — 13:30
• 1.5 км — 15:00
• ХБИ /Тэргэнцэртэй, хараагүй/ 1.5 км — 15:30
• Тусгай олимп 800 м — 16:00
• Тусгай олимп 500 м — 16:10

Усны цэг:

5 км: Ноднин зөвхөн төв талбай дээр байсан бол энэ жил сансрын туннелээр өгсөөд зүүн дөрвөн замруу уруудах замын уулзвар дээр замын баруун зүүн талд 2 усны цэг тавьсан.

Нийслэлийн Эрүүл мэндийн газрын дарга Н.Наранбаатар:

Улаанбаатар марафон гүйлтийн өдөр 31 мэргэжилтнүүд тусламж үйлчилгээ үзүүлнэ. Суурин таван цэгт тусламж үйлчилгээний 18 хүнтэй баг ажиллана. Үүнд зүрх судасны эмч, гэмтлийн эмч, уламжлалтын, сэргээн засах эмч, сувилагч зэрэг мэргэжилтнүүд ажиллана.

Мөн эмч сувилагч жолоочийн бүрэлдэхүүнтэй явуулын таван цэг ажиллана. Энэ жил нийт 152 хүнтэй тусламж үйлчилгээ үзүүлнэ.

Эмнэлгийн тусламж үйлчилгээ 21 км-т түлхүү шаардлагатай байдаг. Зөвхөн энэ зайд 24 мэргэжилтэн байна. 

Ноднингийн марафоны үеэр эмнэлгийн тусламж авсан хүмүүсийн

• 68 хувь нь шөрмөс татах
• 10 хувь зүрх судасны эмгэгтэй холбоотой тусламж
• 4 амьсгалын замын эрхтэнтэй холбоотой тусламж авчээ. 12 оролцогчийг дараагийн шатны эрүүл мэндийн байгууллагад хүргэсэн.

Анхаарах зүйл:

Гараанаас гарахдаа хэт хурдлах, ус бага хэрэглэх, шинэ пүүз өмсөх, кофе хэрэглэх, өлөн гарах, барианд орсны дараа гэнэт зогсох, гэнэт суухаас зайлсхийгээрэй. Хэрэв та толгой эргэх, цээжээр өвдөх, амьсгал давчдах, орон зайн баримжаа алдах зэрэг шинж тэмдэг илэрвэл гүрийхгүйгээр тусламж үйлчилгээнд хандаарай.

Тээврийн цагдаагийн албаны урьдчилан сэргийлэх хэлтсийн ахлах мэргэжилтэн, цагдаагийн хошууч Г.Отгонтамир:

Тавдугаар 23-ны өдөр өглөөний 06 цагаас оройн 19:00 хүртэл зарим замыг хэсэгчлэн хаана. Цахилгаан скүүтэр, мопед, цахилгаан унадаг дугуйтай иргэдийг хаасан замаар орохыг хориглоно.

Шар бүсчлэл дотор байгаа иргэд тээврийн хэрэгсэлтэй хөдөлгөөнд оролцохгүй. Хөдөлгөөн хязгаарлах бүс болон хөдөлгөөн түр хаах уулзвар, гарцын мэдээллийг хүргэж байна.

• Цэцэг төвийн уулзвар
• Цаг уур, орчны шинжилгээний газрын уулзвар
• Чингэлтэй дүүргийн уулзвар
• ХБНГУ-ын Элчин сайдын яамны баруун, зүүн уулзвар
• 11-р хороолол
• Сансарын шатахуун түгээх станц
• Сансарын туннел
• Зүүн 4 замын уулзвар
• Халдварт
• Нарантуул захын уулзвар
• Нүхэн гарц
• Жанжин клуб
• Улиастай уулзвар
• “Дүнжингарав” худалдааны төвийн уулзвар
• Хан-Уул дүүргийн “И-март” худалдааны төвийн уулзвар
• Жаргалан хотхон
• Шангри-Ла төвийн уулзварт тус тус замын хөдөлгөөнийг түр хязгаарлана.

Нийслэлийн цагдаагийн удирдах газрын хэлтсийн дарга Л.Амармөрөн:

Оролцогчдын тоо жил бүр нэмэгдэж байна. Гарааны үед аюулгүй байдлаа анхаарч цагдаагийн байгууллагаас тавьж байгаа шаардлагад анхаараарай. Эд зүйлсээ дагаж ирсэн хүмүүст хадгалуулах хэрэгтэй.

Бага насны хүүхдийг хараа хяналттай байх тал дээр анхаараарай. Уралдааны зам дагуу явган зорчигчид уралдааны замд саад хийхгүй байхыг иргэддээ зөвлөмөөр байна.

Нийтийн тээврийн бодлогын газрын ахлах мэргэжилтэн н.Оюумаа:

Улаанбаатар марафоны үеэр авто замын зорчих хэсгийн хөдөлгөөний хааснаас нийтийн тээврийн үйлчилгээний 55 чиглэлийн 506 тээврийн хэрэгслийн маршрутад өөрчлөлт орж байна. Энхтайвны өргөн чөлөө, Нарны замын хаагдаж байгаатай холбогдуулаад дийлэнх хөдөлгөөн Их тойруугаар явна. Хойноосоо ирж байгаа хөдөлгөөн Сансрын тойрог дээр буцаж эргэнэ, урдаасаа орж ирж байгаа хөдөлгөөн 120 мянгат дээр буцаж эргэнэ. 

Автозамын хөдөлгөөн орой 18 цагт нээгдээд нээгдсэнээс хойш нийтийн тээврийн үйлчилгээний маршрутууд тухайн явж байгаа замаасаа үндсэн маршрут руугаа шилжиж орно. Хаагдаж байгаа замуудаар үйлчилгээ үзүүлж байгаа нийтийн тээврийн үйлчилгээний таван чиглэл бүрэн зогсоно.

• Ч63
• Ч71
• Ч71а
• Ч84
• Ч78

Монголын хөнгөн атлетикийн холбооны ерөнхийлөгч Э.Нарангэрэл:
Монгол Хөнгөн Атлетикийн холбоо нь дэлхийн холбооны гишүүн учраас энэ жил Дэлхийн холбоо болон Азийн холбоонд санал тавьсны дагуу дэлхийн холбооны сертификат V ангиллыг авсан. Дэлхийн холбоо болон Азийн холбооны төлөөлөгч нар ирж 42,21км-н замыг дэлхийн стандартын дагуу хэмжиж баталгаажуулсан. Дэлхийн холбооны өгсөн сертификатын дагуу гүйж байгаа эсэхийг шалгах Азийн холбооноос төлөөлөгчид өнөөдөр ирнэ.

Олон Улсын гүйлтэд Кени, Япон, Хятад, ОХУ-ын тамирчид оролцож байна. 100 шүүгч болон 2500 сайн дурын ажилчид ажиллана.
Монгол Улсын Гавьяат Тамирчин Б.Сэр-Од урилгаар оролцоно. Энэ жил оролцогчдын тоо 40 хувиар нэмэгдсэн. 

"Хай Пэй" ХХК-ийн гүйцэтгэх захирал н.Эрдэнэговь:

Хурд хэмжигч чипийг энгэрийн дугаарын ард нааж өгсөн байгаа. Энэ чипийг нугалахгүй гэмтээхгүй байхад анхаараарай. Гар утсан дээр чипийг нааж болохгүй шүү. 

Улаанбаатар марафон зөвхөн гүйлт биш фестиваль болно. 120 гаруй асар майхан үйл ажиллагаа явуулна. 60 гаруй худалдаа үйлчилгээний байгууллага үйлчилгээ үзүүлнэ. Урлаг спортын үзүүлбэр, үзүүлэн тоглолтууд 12:00-17:00 цагийн хооронд явагдана. 

• Нийтийн иог
• Хүүхдийн цирк
• Хамтлаг дуучид
• Спортын үзүүлэн тоглолтууд
• Кросфитийн холбооноос тэмцээн зохион байгуулна. 5 төрлийн чаллэнж тэмцээнд иргэд оролцох боломжтой.

Манай улсад яг одоо Азийн Тэквондогийн АШТ болж байна. Энэ тэмцээнд ирсэн Тэквондогийн үзүүлбэр үзүүлдэг дэлхийн топ хамтлаг Улаанбаатар марафоны үеэр үзүүлэн тоглолт үзүүлнэ.

Гурван цэгт хөгжмийн фестивал зохион байгуулагдана. Үүнд:

• Авто замын  тэг цэг
• СБ талбайн баруун хойно
• Хятадын элчингийн замын харалдаа

Мөн 20 гаруй хоолны газрууд үйл ажиллагаа явуулна.