Ардчилсан намын Үндэсний бодлогын хорооны хурал өнөөдөр болно. Хурлаар намын Ерөнхий нарийн бичгийн дарга болон дэд дарга нарыг сонгох аж.

Ардчилсан намын Ерөнхий нарийн бичгийн даргад С.Баярцогт нэр дэвшээд буй юм. УИХ-ын гишүүн асан, Ардчилсан намын гишүүн Э.Бат-Үүл “С.Баярцогтын цээжийг нүцгэлээд харвал манай намын хагарал, бутрал, ялагдал, гутралын бүх шарх сорви сийлээстэй байдаг юм, хөөрхий.

Тийм учраас, хагарал, эвдрэлээсээ болж ялагддаг ганцхан шалтгааныг, өөрийн сорвитой шархтай биеэрээ тэр дэндүү сайн мэддэг, мэдэрдэг. Хоригдож байхад нь эргэж очиход тэр надад өөрийнхөө тухай биш, намынхаа хагарлыг засах тухай ярихад нь би уцаарлахад өөдөөс юу гэсэн гээч?!.

"Ийм юм яриад байвал манай нам хэзээ ч ялахгүй. Намаа нураахгүйн тулд Жэнког ч (УИХ-ын гишүүн Х.Баттулга) уучлахаас өөр аргагүй" гэж билээ. Намаа эв нэгдэлтэй болгож, ялалтад хүргэнэ гэдэг бол, зовлонгийн ёроолд байхдаа түүний өөртөө тавьсан тангараг” хэмээн цахим хуудсаараа дамжуулан сэтгэгдлээ илэрхийлжээ.