Монгол Улсын Тагнуулын ерөнхий газрын Тусгай архив болон Дилав хутагт сан хамтран ажиллах гэрээ байгуулж, Дилав хутагт Башлуугийн Жамсранжавын түүх, намтар, үйл хэрэгтэй холбоотой архивын баримт, материалыг судлан шинжлэх, эмхтгэн боловсруулах, эрдэм шинжилгээний эргэлтэд оруулах, олон нийтэд хүргэх чиглэлээр ажиллаж эхэллээ.

Дилав хутагт Б.Жамсранжавтай холбоотой архивын баримт материалыг гурван цуврал бүтээл болгон эмхтгэн хэвлүүлэхээр төлөвлөжээ. Тус бүтээлүүд нь Монгол Улсын түүх, соёл, улс төр, нийгмийн тухайн үеийн нөхцөл байдал болон Дилав хутагтын амьдрал, үйл хэргийг судлан шинжлэхэд эх сурвалжийн ач холбогдол бүхий бүтээл болох юм.

2022 оны зургаадугаар сард Монгол Улсын Засгийн газрын шийдвэрээр улсын нууцаас гаргаж, олон нийтэд нээлттэй болж, тус архивт хадгалагдаж буй Дилав хутагт Б.Жамсранжавт холбогдох 1,039 хуудас архивын баримт материалд судалгаа шинжилгээ хийх, эмхтгэн хэвлэх ажлыг хэрэгжүүлнэ.

Талууд уг архивын баримт материалыг нягтлан судалж, эх баримтын бүрэн бүтэн байдал, агуулга, түүхэн ач холбогдлыг хадгалан эмхтгэхийн зэрэгцээ уламжлалт монгол бичгээс хөрвүүлэн материалын бичвэр, хэл найруулга, нэр томьёо болон орчуулгын нягтлан шалгалтыг хамтарсан эрдэмтдийн багаар хийж гүйцэтгэнэ.

Мөн цуврал бүтээлүүдийг дотоод, гадаадын номын сан, эрдэм шинжилгээ, судалгааны байгууллага, монгол судлалын төвүүдэд хүргэх замаар Монголын түүх, соёлын холбогдох эх сурвалжийг олон улсын судалгааны эргэлтэд оруулахыг зорьж байна.