Монголчууд Азийн бусад улсыг бодвол европ хүмүүжил, боловсрол эзэмшсэн хэмээн их бахархдаг.

Харин европт шуудангийн үйлчилгээ нь манайхаас шал өөр түвшинд байдгийг бидний дийлэнхи нь мэддэггүй. Тэнд хүн өглөөний цай уухдаа шинэхэн талх, шинэ хэвлэлтэйгээ суудаг билээ. Оросод өглөө 6 цагт сонин зардаг мухлагууд тухайн хотынхоо хаа сайгүй төв, алслагдсан дүүргүүдэд онгорхой, тэр өдрийнхөө шинэ сонинг зарж байдаг юм. Зарим хүн шинжлэх ухаан хөгжөөд сонин унших шаардлагагүй, интернетээр мэдээллээ авахад хангалттай гэж. Бүх юм нь хөгжсөн Америкад ч сонин хэвлэлээ захиалж л уншдаг юм билээ. Тэгээд ч манайд интернет тавиулсан өрх гэр хэдэн хувь нь билээ.

Манайд юун зургаан цагт шинэ талх, шинэ хэвлэл, шуудангийн салбарууд гэрийнхээ шуудангийн хайрцагаар сонин захиалсан хүмүүст хэвлэлийг нь хамгийн эрт нь 10 цагаас хойш хүргэж өгөх юм. Яагаад хэвлэлийг өглөө үүрээр 5-6 цагийн хооронд хайрцагт нь хийж өгч болохгүй гэж. Энд зөвхөн Монгол шуудан ХХК-ны албан тушаалтнуудын хөдөлмөр зохион байгуулалт, шинэ сэтгэлгээ л хэрэгтэй. Өөрөөр хэлбэл шинэ сонины ач холбогдлыг уг компаний нийт ажиллагсад бүрэн ойлгож байж л...  

Харин албан байгууллагууд арай эрт, 9-10 цагийн хооронд сонингоо авдаг бололтой. Энд нэг санал хэлэхэд эрхэм ерөнхий сайд болох болохгүй асуудлуудыг хорьж хэл аманд орж байхаар, улсын болон төсвийн мөнгөөр хэвлэл захиалдаг явдлыг маш хатуу таслан зогсоож, хэвлэл уншиж боловсрол мэдлэгтээ анхаарах хүмүүс нь гэрийнхээ хаягаар хувийнхаа мөнгөөр хэвлэлээ уншдаг болгох хэрэгтэй. Тэгвэл нөгөө талаас хэвлэл эрт хүргэгддэг асуудалд дөхөм болох ба улсын мөнгийг хувьдаа бага ч болов ашиглах хомхой сэтгэл нь бага зэрэг засагдах болов уу. Тэгээд ч төсвийн хэмнэлтэд хэрэгтэй.

Үүнтэй ижлээр 10 цагийн үед л зөвхөн хотын төв орчим л хэвлэл зарж эхлэж байгаа нь тухайн сонин түүн дотор бичигдсэн мэдээллийн шинэ байдлын ач холбогдлыг үгүй хийж байна.

Ер нь Монгол шуудан компанийг нэн яаралтай хувьчилж байж л асуудал зөв гольдрилдоо орно доо эрхэм төрийн түшээд ээ.