Лос Анжелес Лейкэрс баг Нью Орлеанс Хорнетс багийн талбайд зочлон тоглолоо. Энэхүү тоглолтонд Лейкэрс 103-87 харьцаагаар ялалт байгуулж улирлын 9 дэх хожлоо байгуулсан. Коби Брайнт энэхүү тоглолтонд 29 оноо авч багаа тэргүүлсэн ба тэрээр 30000 дахь оноогоо авч НБА-д 30000-аас дээш оноо авсан 5 дахь тоглогч болж байна. Мөн тэрээр энэхүү босгыг давсан хамгийн залуу тоглогч болж түүхэнд нэрээ мөнхөлж байна.

Ийнхүү та бүхэндээ НБА-ийн түүхэнд хамгийн өндөр оноог авсан 10 тоглогчийг танилцуулъя:

10. Оскар Робертсон – 26710 оноо



Өдгөө 74 настай тэрээр Милауки Бакс багт хүчин зүтгэж байсан. 1964 оны НБА-ийн шилдэг тоглогч буюу МВП цолыг хүртэж, 1971 онд Милауки багийн хамт НБА-ийн аварга болж байжээ. Тэрээр карьерийнхаа туршид нийт 26710 оноо, 7804 самбараас бөмбөг авалт, 9887 оновчтой дамжуулалт өгч байсан юм. Түүнчлэн 6 улирал дараалан нэг тоглолтонд 30-аас дээш оноог дунджилж байсан гайхалтай тоглогч.

9. Хаким Олажувон – 26946 оноо



Энэ бол Хьюстон Рокетс багийн домог Хаким Олажувон. Нигери гаралтай Америк иргэншилтэй түүний карьерийн хамгийн оргил үе нь 1994, 1995 онууд байсан. Драфтын нэгээр сонгогдож НБА-д орж байсан тэрээр НБА-ийн нэг удаагийн МВП, 2 удаагийн аварга, 2 удаагийн финалын МВП болж байсан амжилттай. Мөн 1996 оны Атлантагийн олимпийн аварга болж байсан. Тэрээр карьерийн турш нийт 26946 оноо, 13747 самбараас бөмбөг авалт, 3830 блок-шот хийсэн.

8. Элвин Хэйес – 27313 оноо



1978 оны НБА-ийн аварга Элвин Хэйес. Өдгөө 67 настай тэрээр улиралд нэг тоглолтонд авсан дундаж оноогоороо  НБА-г тэргүүлж байсан хамгийн сүүлчийн рүүки тоглогч юм. Мөн л драфтын нэгээр сонгогдож байсан бөгөөд НБА-д хүчин зүтгэсэн 16 жилийнхээ турш 12.5 самбараас бөмбөг авалтыг дунджилж байсан. 16 жилийн турш ийнхүү гайхалтай амжилтыг үзүүлнэ гэдэг гайхалтай биш гэж үү. Тэрээр Карьерийнхаа турш нийт 27313 оноо, 16279 самбараас бөмбөг авалт, 1171 блок-шот хийж байжээ.

7. Моүсэс Мэлон – 27409 оноо



21 жил НБА-д хүчин зүтгэсэн Мөүсэс Мэлон. Энэ хугацаанд 9 өөр багт тоглож байсан тэрээр 1983 оны НБА-ийн аварга, тухайн улирлынхаа финалын МВП болж байсан бөгөөд 3 ч удаа НБА-ийн шилдэг тоглогч, “МВП” болж байсан амжилттай. Будагтай талбайн гайхалтай тоглолтоор алдаршсан тэрээр НБА-д нийт 27409 оноо авсан байжээ. Мөн АБА-д тоглож байсан тэрээр мэргэжлийн сагсан бөмбөгчний карьертаа 17834 самбараас бөмбөг авалт, 1936 оновчтой дамжуулалт өгч байсан.

6. Шакил О’Нил – 28596 оноо



1992 оны драфтын №1 Шакил О’Нил, 4 удаагийн НБА-ийн аварга, 3 удаагийн финалын МВП, 1 удаагийн улирлын МВП. Олимп, дэлхийн аварга тэрээр НБА-д 19 жил тоглохдоо 24 оноог дунджилж байсан бөгөөд, түүний довтолгооны хувь 58 хувьтайгаар бүртгэгдсэн байдаг. Тэрээр 2000 оны плей-оффт нэг тоглолтонд 30.7 оноо, 15.4  самбараас бөмбөг авалтыг дунджилж байсан. Тэрээр карьерийнхаа турш нийт 28596 оноо, 13099 самбараас бөмбөг авалт, 2732 блок-шот хийж байжээ.

5. Коби Брайнт – 30016 оноо



1996 оны драфтын №13 тэрээр одоог хүртэл гайхалтай тоглолтоо үзүүлсээр байна. НБА-ийн 5 удаагийн аварга, 2 удаагийн финалын МВП, нэг удаагийн улирлын МВП тэрээр дөнгөж саяхан 30000 онооны босгыг давсан билээ. Олимпийн 2 удаагийн аварга Коби Брайнт энэ улиралд карьерийн хамгийн өндөр буюу 49 хувьтай довтолгоог гүйцэтгэж байгаа бөгөөд нэг тоглолтонд дунджаар 28 оноог авч байна. Түүнийг өөрийн гайхалтай тоглолтоо цаашид үзүүлсээр байх болно гэдэгт итгэж байна.

4. Вилт Чамберлэйн – 31419 оноо



14 жил НБА-д хүчин зүтгэсэн домогт Вилт Чамберлэйн. НБА-д байх хугацаандаа 2 удаа аварга цолыг хүртэж, нэг удаа финалын МВП, 4 удаа улирлын МВП-ээр тодорч байв. Гайхалтай тоглолтоороо нийт  карьертаа нэг тоглолтонд 30 оноо, 24 самбараас бөмбөг авалтыг дунджилж байсан юм. Тэрээр нийт 31419 оноо авсан гэсэн үзүүлэлтээр жагсаалтын 4-р байрт бичигдэж байгаа бөгөөд 23924 самбараас бөмбөг авалт, 4634 оновчтой дамжуулалтыг мөн өгч байжээ.

3. Майкл Жордан – 32292 оноо



Энэ эрхэмийг танилцуулах нь илүүц болов уу. НБА-ийн түүхэн дэх хамгийн шилдэг сагсан бөмбөгчин гэж хэлж болохуйц энэ тоглогч НБА-ийн удаагийн аварга, 6 удаагийн финалын МВП, 5 удаагийн улирлын МВП болсон бахдам амжилттай. Үүгээр зогсохгүй олимпийн 2 удаагийн аварга хэмээх эрхэм хүндтэй цолыг хүртэж асан МЖ23 карьерийнхаа туршид нийт 32292 оноо (нэг тоглолтонд дунджаар 30.1 оноо), 6672 самбараас бөмбөг авалт, 5633 оновчтой дамжуулалт өгч байсан.

2. Карл Мэлон – 36928 оноо



Юта Жаззын домог Карл Мэлон. Анх 1985 онд драфтын №13-аар сонгогдож Ютад очиж байсан тэрээр энэ багтаа 18 жил үнэнчээр хүчин зүтгэсэн. НБА-ийн аваргын бөгжийг хүртэж байгаагүй ч гэсэн 2 ч удаа улирлын МВП-ээр нэрлэгдэж байсан юм. Тэрээр карьерийнхаа турш нийт 36928 оноо (нэг тоглолтонд дунджаар 25 оноо), 14968 самбараас бөмбөг авалт (нэг тоглолтонд дунджаар 10 самбараас бөмбөг авалт), 5238 оновчтой дамжуулалтыг өгч байсан.

1. Карим Абдул-Жаббар – 38387 оноо



Жагсаалтыг тэргүүлэгч эрхэм бол мэдээж хэрэг Карим Абдул-Жаббар юм. 1969 оны драфтын №1 тэрээр Милауки Бакс болон Лос Анжелес Лейкэрс багуудад тоглож байсан. Гэхдээ түүний хамгийн гайхалтай амжилтууд Лейкэрст байх хугацаанд түүнд ирсэн. Тэрээр НБА-ийн 6 удаагийн аварга, 2 удаагийн финалын МВП, 6 удаагийн улирлын МВП болж байсан амжилттай. НБА-ийн түүхэн дэх хамгийн их оноог авсан энэ эрхэм нийт 38387 оноо (нэг тоглолтонд дунджаар 24.6 оноо), 17440 самбараас бөмбөг авалт (нэг тоглолтонд дунджаар 11.2 самбараас бөмбөг авалт), 3189 блок-шотыг хийж байсан юм.

“CSPORTS TEAM”