Египед улсад шувууны ханиадын вирусаар (H5N1) өвдсөн нэг хүн амиа алдлаа. Тус вирусын улмаас амиа алдсан хүмүүсийн тоо долоод хүрсэн хэмээн Египетийн Эрүүл мэндийн яамыг иш татан Reuters мэдээлж байна.

Египет улсад энэ оны эхнээс H5N1 вирусын халдвар авсан 14 тохиолдол бүртгэгдсэн юм. Энэ сард л гэхэд тус вирусын халдварыг хоёр хүн авсан гэдэг нь лабораториар тогтоогджээ.

Орон нутгийн хэвлэлүүдийн мэдээлж буйгаар тус вирусын халдвар тээж буй хүмүүсээс 33 настай эмэгтэйгийн биеийн байдал маш хүнд байгаа гэнэ.

Эрх баригчдын мэдээлж буйгаар амиа алдсан хоёр иргэн тэжээмэл шувуу тэжээдэг байжээ.

Түүнчлэн Канадын баруун хэсэгт байрлах Эбботсфорд болон Чилливак гэсэн хоёр фермерийн аж ахуйд шувууны томуугийн тохиолдол илэрсэн.

Тус фермд тэжээгдэж байсан 18 мянга орчим тахиа, цацагт хяруулыг устгасан бөгөөд аж ахуйг хаан, хөл хорио тогтоогоод байгаа юм.

ДЭМБ мэдээлж буйгаар 2003 оноос хойш шувууны томуугийн халдвар авсан 668 тохиолдол бүртгэгджээ. Эдгээр хүмүүсийн 58 хувь нь тус вирусын улмаас амиа алдсан байна.

Эх сурвалж: Reuters