БНХАУ руу нүүрс тээвэрлэдэг хүнд даацын ачааны машины жолооч зам тээврийн осол гаргаж Өмнөговь аймгийн гурван иргэний амь насыг хохироолоо. Тус аймгийн иргэдээс авсан мэдээллээр уг осол Гурвантэс сумын нутагт уржигдар буюу энэ сарын 20-ны 13.00 цагийн үед Шивээхүрэнгийн хилийн боомтын ойролцоо болсон аж. Ослын улмаас Өмнөговь аймгаас БНХАУ руу зорьж явсан “Фургон” автомашинтай дөрвөн хүний хоёр нь газар дээрээ нас баржээ. Хоёр хүнийг нь тус боомттой хил залгаа Сэхэ боомтын эмнэлэгт хүргэсэн ч нэг нь нас барсан гэнэ.

Осол хүнд даацын нүүрс зөөдөг ачааны машинуудын явдаг зам дээр болжээ. Энэ талаар Өмнөговь аймгийн цагдаагийн хэлтсийн ажилтантай холбогдож тодруулахад “Гурвантэс сумын нутагт Шивээхүрэнгийн хилийн боомтоос 28 км-ийн зайтай улсын хилээс дотогш болсон энэ ослыг шалгахаар ажлын хэсгийнхэн явсан. Осол болсон газарт холбоо харилцаа байхгүй болохоор ажлын хэсгийнхэнтэй холбогдож чадахгүй байгаа. Тиймээс бид тодорхой мэдээлэл өгөх боломжгүй байна” гэв.   

Өөр нэгэн эх сурвалж “Өмнөговь аймгийн Даланзадгад сумын иргэн Хүдэрзааны 18-66 ӨМА улсын дугаартай “УАЗ-Фургон” автомашины араас 70-80 тоннын даацтай ачааны машин мөргөснөөс жолоочоос гадна нэг хүн газар дээрээ нас барсан. Нарийн сухайтын нүүрсний уурхайгаас БНХАУ руу нүүрс тээвэрлэдэг “Дөрвөн зам” компанийн 53-24 ӨМА улсын дугаартай “Чинхуа” маркийн автомашины жолооч БНХАУ-ын иргэн энэ ослыг гаргасан. Осол юунаас болж гарсныг хэргийн газарт үзлэг шинжилгээ хийсэн шинжээчид гаргана. Урьдчилсан таамаглалаар тоос шороо ихтэй үзэгдэх орчин муу байснаас осол гарсан байх. Осолд орсон хоёр хүний нэг нь хүнд гэмтэлтэй байсан гэсэн. Түүнийг БНХАУ-ын Сэхэ боомтын эмнэлэгт аваачиж эмчилгээ хийсэн ч сэхэл авалгүй нас барсан. Нэг хүний бие хүнд, тус боомтод эмчлүүлж байгаа гэсэн мэдээлэл бидэнд ирсэн” гэлээ.