Улаанбаатар хотын гадаад орчны агаар дахь РМ бохирдлын түвшин уушигны хавдраар үүдсэн нас баралтын 34 хувийг, уушиг зүрх судасны хавсарсан өвчний нас баралтын 24 хувийг, нийт хүн амын нас баралтын 8,2 хувийг бий болгож байна.

ДЭМБ-ын мэдээлж байгаагаар харшлын шалтгаант өвчлөл жил ирэх тутам нэмэгдэж, нийт өвчлөлийн 15-25 хувийг эзэлж байна. Монгол улсад 2009 онд харшлийн шалтгаант арьсны өвчлөл 14209 бүртгэгдсэн нь нийт өвчлөлийн 30 гаруй хувийг эзэлжээ.

Улаанбаатар хотын агаар дахь тоос, хүхэрлэг хий, азотын давхар исэл, нүүрстөрөгчийн дутуу ислийн агууламж нь хүүхдийн гуурсан хоолой цочмог болон архаг үрэвсэл, уушигны үрэвслийн нэг шалтгаан болж байна.

Төрөлхийн гаж хөгжил нь нярайн болон нялхсын эндэгдлийн тэргүүлэх шалтгаан болж байгаа бөгөөд 1998 онд нялхсын эндэгдлийн шалтгаанд төрөлхийн гаж хөгжил 2,3 хувийг эзэлж байсан бол 2010 онд 13,4 хувь болж зургаа дахин нэмэгдсэн байна.

2006 онд хийсэн судалгаагаар Улаанбаатар хотын хүүхдийн цусанд агуулагдах хар тугалганы дундаж хэмжээ 16,5 мкг/дцл байсан бөгөөд хүүхдүүд ой тогтоолт буурах, анхаарал сулрах шинж тэмдгүүд илэрч эхэлжээ.

Улаанбаатар хотын агаарын чанар жилээс жилд муудаж хүхэрлэг хийн жилийн дундаж агууламж 2005 онд 13мкг/мЗ байсан ба 2010 онд 27 мкг/мЗ болсон нь 14мкг/мЗ-ээр өсөж, агаарын чанарын MNS 4585:2007 стандарт дахь хүлцэх хэм хэмжээнээс /XXX/ 2,7 дахин их, хоногийн дундаж агууламжийн хамгийн их нь 106 мкг/мЗ хүрч ХХХ-ээс тав дахин ихээр бохирдсон байна.

Азотын давхар ислийн жилийн дундаж агууламж 2005 онд 29 мкг/мЗ байсан ба 2010 онд 35 мкг/ мЗ болж 6мкг/мЗ-ээр өсч, ХХХ-тэй харьцуулахад 1,2 дахин их, хоногийн дундаж агууламжийн хамгийн их байгаа нь Баруун 4 зам орчимд 119 мкг/мЗ хүрч XXX-нээс 2,9 дахин их болсон байна.