Дэлхийн эрүүл мэндийн байгууллага Бүгд найрамдах ардчилсан Конго улсад дэгдээд буй эбола вирусийн халдварыг олон улсын анхаарал татсан эрүүл мэндийн онцгой байдал гэж зарлалаа. 

Тус улсын зүүн хэсэгт орших Итури мужид эбола вирусийн сэжигтэй 246 тохиолдол гарч, 80 хүн амиа алдаад байна. 

Гэхдээ одоогоор цар тахлын түвшний нөхцөлд хүрээгүй гэдгийг ДЭМБ онцлов. 

Харин бүртгэгдсэнээс хавьгүй өргөн хүрээтэй дэгдэлт байх магадлалтай бөгөөд орон нутаг болон бүс нутагт тархах өндөр эрсдэлтэйг анхааруулжээ.

Уг дэгдэлтийг үүсгэсэн вирус нь "Bundibugyo" төрлийн вирус бөгөөд үүнээс урьдчилан сэргийлэх батлагдсан вакцин, эмчилгээ одоогоор байхгүй аж.

Халдвар авсан тохиолдолд халуурах, ядрах, толгой өвдөх, хүндэрвэл бөөлжих, суулгах, дотуур цус алдах зэрэг шинж тэмдэг илэрдэг байна.

ДЭМБ бүс нутгийн тогтворгүй байдал, хүмүүнлэгийн хямрал, хүн амын идэвхтэй шилжилт хөдөлгөөн, эмнэлгийн албан бус байгууллагууд олноор ажиллаж байгаа нь халдвар тархах эрсдэлийг нэмэгдүүлж байгааг онцолжээ.

Мөн Конготой хиллэдэг орнууд худалдаа, зорчих хөдөлгөөнөөс шалтгаалан өндөр эрсдэлтэйд тооцогдож байгаа аж. Руанда улс урьдчилан сэргийлэх зорилгоор хил дээрх хяналтаа чангатгаж байгаагаа мэдэгдсэн байна.

Эбола вирус анх 1976 онд Конго улсад илэрсэн бөгөөд сарьсан багваахайнаас хүнд халдсан гэж үздэг. Энэ удаагийнх нь тус улсад бүртгэгдэж буй 17 дахь удаагийн дэгдэлт юм.

ДЭМБ-ын мэдээлснээр эболаг вирусээр амиа алдах эрсдэлийн түвшин ойролцоогоор 50 хувь байдаг аж.

2018-2020 онд Конгод гарсан хамгийн том дэгдэлтийн үеэр 2300 орчим хүн нас барж байв.

Эх сурвалж: ВВС