Герман улс өнгөрсөн сард Лайпцигийн нисэх буудлыг онилон үйлдсэн дроны халдлагын цаана ОХУ байсан гэж буруутгаж, Москвагийн эсрэг хэд хэдэн  арга хэмжээ авахаа мэдэгдлээ.

Германы Дотоод хэргийн сайд Александр Добриндт мягмар гарагт сэтгүүлчдэд мэдээлэл хийх үеэрээ тус улсын аюулгүй байдлын заналхийллийн түвшний үнэлгээг ерөнхий түвшнээс өндөр болгон нэмэгдүүлснээ мэдэгдэв.

Тэрбээр “Бид дайтаж байгаа биш. Гэхдээ өдөр бүр далд халдлагын бай болж байна” гэжээ.

Мөн Германы Гадаад хэргийн сайд Йоханн Вадефуль Бонн хот дахь ОХУ-ын консулын газар болон Берлин дэх соёлын төв болох “Оросын ордныг хаах шийдвэр гаргасан байна. Түүнчлэн Герман улс тус улсад нэвтрэх ОХУ-ын иргэдэд тавих хяналтаа чангатгахаар болжээ.

Уг дрон цэргийн зориулалттай тэсрэх бодис тээвэрлэж байжээ.

Европын Холбооны гүйцэтгэх засаглал болох Европын Комиссын Ерөнхийлөгч Урсула фон дер Ляйен Европын холбооны Гадаад хэргийн сайд нар энэ долоо хоногийн сүүлээр ОХУ-д үзүүлэх тодорхой хариу арга хэмжээ, тэр дундаа нэмэлт хориг арга хэмжээ зарлана гэж мэдэгджээ.

Өмнө нь АНУ-ын тал мөн Германы зүүн хэсэгт орших нисэх буудлаас илрүүлсэн, тэсрэх бодис тээвэрлэж байсан дрон ОХУ-ын тагнуулын байгууллагын харьяалалд байсан гэж үнэлжээ. 

Уг хэрэг явдал нь нислэгийн үйл ажиллагаанд томоохон саатал үүсгэж, Европ даяар аюулгүй байдлын асуудалд анхаарал хандуулахад хүргэсэн байна.

Германы эрх баригчдын мэдээлснээр, дроныг наймдугаар сарын 4-нд шөнө  Лайпциг/Халле нисэх буудлын хамгаалалттай бүсээс илрүүлжээ. Тодруулбал, ачааны нислэг үйлддэг нисэх буудлын урд зурвасын ойролцоо байсан аж.

Уг дроныг шалгаж, аюулгүй болгохоор тэсрэх бөмбөг устгах зориулалттай робот ашигласан бөгөөд дронд холбогдсон тэсэлгээний төхөөрөмжийг салгасан байна.

Хэргийн газраас авсан гэрэл зургуудад робот дронд ойрхон байрлахын зэрэгцээ Украины ачааны онгоц мөн харагджээ. Уг дрон цэргийн зориулалттай тэсрэх бодис тээвэрлэж байсан гэнэ.

Эх сурвалж: CNN