Зээлийн мэдээллийн санг Монголбанк саяхныг хүртэл бүртгэсээр ирсэн. Гэвч үүнийг зарим хүн хар жагсаалт гэж нэрлэн, нийгэмд буруу ойлголт төрүүлсэн.
 
Бусад улсуудад зээлийн мэдээллийн санг төрийн байгууллага бүртгэж, хамгийн хямд буюу үйл ажиллагааны зардлаа нөхөхийн тулд банкууд гэх мэт санхүүгийн байгууллагадаа төлбөртэйгээр ашиглуулдаг. Гэтэл одоо манайд хувийн хоёр компани зээлийн мэдээллийг хариуцаж байна. 

Үүнийг улс төрд нөлөө бүхий этгээд ашиг олох хэрэгсэл гэж харсан. СӨХ-ийн төлбөр, орон сууцны конторын төлбөрөө иргэд цаг тухайд нь төлсөн үү гэдэг мэдээллийг хувийн компаниуд цуглуулан, мэдээллээ боловсруулаад өртөг шингэсэн үйлчилгээ болгож худалдаж болно. Зээлийн оноо өгөх нь нэмэлт үйлчилгээ юм. Сайн бүтээгдэхүүн болбол санхүүгийн байгууллагууд худалдаж авна.
 
Санхүүгийн үйлчилгээ хямд байх тусам хүртээмжтэй байна. Гэтэл Монголбанк зээлийн мэдээллээ хоёр хувийн компанид (“Сайн Скор ХХК”, “Бүрэн Скор ХХК”-) өгчихсөн. Иргэд өмнө нь үнэгүй авдаг байсан үйлчилгээг одоо 3000 төгрөгөөр авч байна гэж Монголын банкны холбооны захирал Л.Амар шүүмжлэв.

Манай улсад 82 финтек ББСБ бий. Эдгээр байгууллага өөрийн аппликэйшнээр дамжуулан иргэд, ААН-үүдэд шуурхай зээл олгодог. Гэвч тухайн иргэний зээлийн хэмжээ нэмэгдсэн, зээлийн давтамж өссөн гэх мэт хэд хэдэн шалтгаанаар зээл хүсэхэд нь зээлийн эрхээ шалгуулахыг хүсдэг. Зээлийн эрхээ шалгуулахгүй бол зээл авч чадахгүй тул арга буюу зөвшөөрч, нэг удаад 1000 төгрөгийг төлж, үйлчилгээ авч байна.

Зээлийн оноогоо шалгуулахад 3000 төгрөгийн үнэтэй.