Иргэн Р.З нь 2024 оны дөрөвдүгээр сараас Н ХХК-д зорчигч чиглүүлэх ажилтнаар ажиллаж эхэлсэн ба түүнийг ажлын байранд архи согтууруулах ундааны зүйл хэрэглэсэн үндэслэлээр халжээ.

Харин Р.З нь уг шийдвэрийг эс зөвшөөрч, тухайн үед архи, согтууруулах ундааны зүйл хэрэглээгүй хэмээн маргаж, ажил албан тушаалд эгүүлэн томилуулах, ажилгүй байсан хугацааны цалин хөлстэй тэнцэх хэмжээний олговор 6 сая төгрөг гаргуулах, нийгмийн болон эрүүл мэндийн даатгалд нөхөн бичилт хийлгэх тухай нэхэмжлэл гарган маргалджээ.

Р.З нь ажилдаа ирсэн, албаны дарга нь түүнийг согтуу байна гэж дагуулан эмчийн өрөөнд очсон, эмч үзлэг хийж багажаар үлээлгэсэн, согтуурлын зэрэг 0.4%-тай гарсан.

Гэхдээ тус багаж нь Стандарт, хэмжил зүйн газраас баталгаажуулсан зориулалтын багаж биш харин тандагч тест байсан. 

Хяналтын шатны шүүх хэргийг хэлэлцээд маргаан бүхий тушаалын үндэслэл нь ажилтан ажлын байранд согтуу байсан, согтуу ирсэн, согтуурлыг шалгасан тестийн багажаар 0.4 гэсэн хэмжээтэй гарсан талаарх үйл баримт тогтоогдсон.

Хэдийгээр тус багажийг хэрэглэх журам хариуцагчид байхгүй боловч тус багаж нь согтууруулах ундаа хэрэглэсэн эсэхийг шалгахад хэрэглэдэг, ажилтан татгалзаагүй зөвшөөрч шалгуулсан, нэхэмжлэгч нь ноцтой зөрчил гаргасан гэж үзэж нэхэмжлэгчийн нэхэмжлэлийг хэрэгсэхгүй болгожээ.