Олон улсын ахмадын өдрийг тохиолдуулан нийслэлийн төр засгийн байгууллагад ажиллаж байсан 110 ахмадыг Нийслэлийн удирдлагууд “Хангарьд ордон”-д хүлээн авч уулзлаа.

НИТХ-ын дарга Д.Баттулга, “АН сонгуульд ялж нийслэлийн удирдлагад ажиллаж байсан ахмадуудтай анх удаа уулзаж байгаадаа баяртай байна. Бид цаашдаа эмх цэгцтэй, хуулийн дагуу ажилладаг, шинэчлэсэн нийслэлтэй болохын төлөө ажиллана. Шинэчлэл, хөгжлийн ажилд та бүхний санал, зөвлөгөө үнэ цэнэтэй" гэж хэллээ.

Нийслэлийн Засаг дарга Э.Бат-Үүл “Хүнээ боддог, иргэддээ үйлчилдэг нийслэлтэй болохын төлөө аюулгүй, амгалан тайван аж төрөх уламжлалыг сэргээн ажиллана” хэмээн ахмадуудад ам гарлаа.

Энэ үеэр нийслэлийн ахмадын хорооны ажилд идэвхтэй оролцож буй Л.Жигжидсүрэн, Т.Ноост, Б.Бадрах, У.Аюуш, Б.Ариунаа нарыг шагнажээ.

Хотын дарга асан, өндөр настан Х.Мөнхжаргал “20 жилийн дараа шинэ удирдлагууд нийслэлд сэтгэлгээний шинэчлэл хийлээ. Замын түгжрэлийг бууруулах, нийтийн тээвэр, тусгай автобусны үйлчилгээг зохицуулах, газрын харилцаа, хот төлөвлөлт, зөвшөөрөлгүй барилгын асуудлыг шийдэх зэргээр богино хугацаанд их ажил хийжээ. Агаарын бохирдлын эсрэг гэр хорооллын асуудлыг зоригтой шийдэж байгаа нь зөв. Бидний санаанд байвч сачий хүрээгүй ажлыг Э.Бат-Үүл зоригтойгоор эхлүүлж байгаад талархаж байна” хэмээн сэтгэгдлээ хуваалцлаа.

Д.Оюун