Өнгөрөгч мягмар гаригт хип хопчид "Доргио раrtу 7 жил" буюу Монголын хип хоп холбоо байгуулагдсаны долоон жилийн ойгоо нижгэр тэмдэглэлээ. UB Palace-ийн задгай талбайд зохиогдсон уг шоу товлосон цагаасаа жаахан оройтож, үзэгч олноо бухимдуулсан ч гэнэтийн бэлгээр дүүрэн байлаа.

Уг шоуны салхийг "Flash" хамтлаг хагаллаа. Мөн хөтлөгч Өөскөө, Цоомоо хоёр ирсэн зочдоо үнэхээр хөгжөөж байсныг дурдах хэрэгтэй. Түүнээс гадна "М.С", "Gee", "Outlaw", "Н2" зэрэг шинэ хамтлаг, дуучдын тоглолтоор үргэлжилсэн шоуны хоёрдугаар хэсэг Америкийн "харуудын" үгэлдэг урсгалыг Монголд анх нэвтрүүлсэн, "Ice Top", "Мон Та Реп", "Хар Тас" зэрэг хамтлагийн тоглолт хурсан залуусыг үнэхээр доргиож байв. Мөн хип хоп залуусын шүтээн "Ice Top” хамтлагийг гарч ирэхэд залуус үнэхээр галзуурах шахаж байсан. Тус хамтлагийн залуус "Бид та нарыгаа их санасан байна. Удахгүй болох бидний бие даасан тоглолтон дээр уулзацгаая" гэв.

Тэд дуучин ВХ-ийн хамт "Амьдрал өөрөө сак" дуугаа дуулсан нь шоуны оргил хэсэг байлаа. Харин энэ шоуны үеэр Хип хоп холбооны ерөнхийлөгч Бааварыг СТА цолоор шагнасан нь ёстой жинхэнэ гэнэтийн бэлэг болов. Тэрчлэн шөнийн нэг цаг хүртэл үргэлжилсэн хип хопчдын энэхүү баярын ажиллагааг, хип хопын "Загалмайлсан эцэг" гэгддэг "Хар сарнай" хамтлаг ая дуугаараа өндөрлөлөө.

Ж.Мөнхгэрэл