Зам, тээврийн яам болон ИНЕГ-аас өгсөн чиглэлийн дагуу орон нутгийн нислэгийг сэргээн тогтмолжуулах ажлын хүрээнд Улаанбаатар-Ховдын чиглэлд том оврын агаарын хөлгөөр үйлдэх нислэгийн техникийн бэлтгэл ажил бүрэн хангагджээ.

Улаанбаатараас Ховдын чиглэлд “МИАТ” компани Бойнг-737 агаарын хөлгөөр зорчигч тээвэрлэж, Ховдоос Увс, Баян-Өлгий аймгийн төвүүд рүү “Аэромонголиа” компани Фокер-50 онгоцоор хүргэх шинэ нислэгийн шалгалтын нислэг маргааш болно. Харин энэ сарын 16-ны өдрөөс эхлэн хуваарьт нислэг үйлдэж эхлэх юм.

Улаанбаатараас Ховд хүртэл тийзний үнэ дунджаар 175000 төгрөг бөгөөд өнөөдрийн байдлаар эхний нислэгийн билет борлуулалт 50 гаруй хувьтай байгаа аж. “Орон нутгийн нислэг нь олон улсын нислэгтэй адилгүй. Цаг нь тулж байж захиалга дүүрдэг. Тиймээс нислэг хийх өдөр суудал дүүргэлт сайн байх болов уу гэсэн хүлээлттэй байна” хэмээн “МИАТ” компанийн Маркетинг, борлуулалтын хэлтсийн дарга Д.Оюундэлгэр ярилаа.

"Аэромонголиа" компанийн өмнө нь Улаанбаатар-Ховд, Улаанбаатар-Өлгий, Улаанбаатар-Улаангом чиглэлд дагнан нисдэг байсан нислэгийн тарифыг энэхүү хамтарсан нислэгийн тарифтай харьцуулахад бүх чиглэлдээ 40 хүртэл хувиар хямдарчээ. Мөн Фокер-50 агаарын хөлгөөр нэг зорчигчийн гар тээшийг 15 хүртэл кг-аар хязгаарладаг байсан бол одоо том оврын агаарын хөлгөөр 35 кг хүртэл ачааг үнэгүй тээвэрлэх боломжтой болж байгаа гэдгийг Аэромонголиа компанийн Коммер эрхэлсэн захирал Н.Мөнхжаргал ярилаа.