Москва хот дахь Монголын ЭСЯ-ны хашаанд ахмад дипломатч Ж.Самбуугийн нэрээр нэрлэсэн өргөөг нээжээ.

Ерөнхийлөгч У.Хүрэлсүх Ялалтын баярын 80 жилийн ойн баярт хүрэлцэн ирэх үеэр энэ өргөөг нээсэн байна. Арван ханатай гэрийг "13 арт" компани зургийг нь гарган урлажээ. 13-р зууны үеийн хэв шинж, чимэглэлээр гэрийг бүтээсэн гэв.
 
Москва хотод цас, бороо их ордог, чийглэг тул монгол гэрийг дангаар нь байлгах хэцүү. Эсгий туурга, модон гал нь хурдан илжирдэг аж. Иймд  гэрийн гадна шилэн бүрхүүл хийж, нар салхинаас хамгаалжээ. Шилэн фасадыг Бээжинд хийлгэсэн байна. Өмнө нь энэ суурин дээр зургаан ханатай гэрийг С.Баяр гуай элчин сайд байхдаа босгож байжээ.         

Шалны халаалттай энэ гэрт "13 Арт" компани 20-30 жилийн баталгаа өгчээ. Гэхдээ энэ өвөл Москвад сүүлийн 200 жилд ороогүй их цас орсон тул монгол гэрийг арчлах хэцүү гэж ЭСЯ-ныхан онцолж байв.
  
Москвад хамгийн урт буюу арваад жилийн турш ажилласан дипломатч бол Ж.Самбуу юм. Тэрээр Дэлхийн хоёрдугаар дайны буюу хамгийн хүнд жилүүдэд хойд хөршид Монгол Улсаа төлөөлөн ажиллажээ. Иймд шинэ өргөөг түүний нэрээр нэрлэжээ. Түүний ширээ сандлыг Монголын соёлын төвд үзмэр болгон хадгалсан байв.               

Гадаад харилцааны сайд Б.Батцэцэг гадаад улсуудад суугаа ЭСЯ-д болон консулын газруудад монгол соёлоо сурталчлан таниулахын тулд монгол гэр барих үүрэг өгчээ. Энэ дагуу тус өргөөг байгуулсан байна.