АТГ-ын Мөрдөн шалгах хэлтсээс 2022 оны  нэгдүгээр сарын 31-ний өдөр “Хөгжлийн банкны” гэгдэх хэрэгт нийт 82 иргэн, албан тушаалтан болон 6 хуулийн этгээдэд  эрүүгийн хэрэг үүсгэж, яллагдагчаар татан, мөрдөн шалгах ажиллагаа явуулсан.

Эрүүгийн хэрэг хянан шийдвэрлэх тухай хуулийн 9.1 дүгээр зүйлд зааснаар эрүүгийн хэрэг хянан шийдвэрлэхэд тусгай мэдлэг зайлшгүй шаардагдах асуудлыг тодруулахаар, эсхүл эд зүйл, хөрөнгийн үнэлгээг тогтоолгохоор шинжилгээ хийлгэх шийдвэрийг гаргаж шинжээч томилон ажиллуулдаг.

Энэ дагуу Хөгжлийн банкны эрх бүхий албан тушаалтнуудад холбогдуулан мөрдөн шалгах ажиллагаа явуулж буй хэрэгт нийт 62 удаа тусгай мэдлэг бүхий этгээдийг шинжээчээр томилон, шинжилгээг хийлгэжээ. Шинжилгээ тус бүрт 165 хоногийг зарцуулсан байна.

Шинжээчийн дүгнэлтээр тодруулсан асуудлыг ангилан авч үзвэл:

• Хөгжлийн банкнаас зээл олгосон үйл ажиллагаа нь дүрэм, журамд нийцсэн эсэх асуудлаар Монголбанкны шинжээчээр 36; 
• Битүүмжилсэн, хязгаарласан болон Хөгжлийн банкны хөрөнгөөр худалдан авсан эд хөрөнгийн үнэлгээг тогтоох зорилгоор 12;
• Криминалистикийн шинжилгээ хийх зорилгоор Шүүх шинжилгээний үндэсний хүрээлэнгийн шинжээчээр 6;
• Эдийн засгийн шинжилгээ зорилгоор  Шүүх шинжилгээний үндэсний хүрээлэнгийн шинжээчээр 4;
• Зээлийн хөрөнгийн зарцуулалтыг тодруулах зорилгоор Аудитын дүгнэлт 3;
• Зээлийн барьцаа үл хөдлөх хөрөнгийн шинж чанарыг тодруулах зорилгоор Барилгын хөгжлийн төвийн шинжээчээр 1 дүгнэлтийг тус тус гаргуулсан.

Авлигатай тэмцэх газрын мөрдөгчид уг хэргийн оролцогчдод холбогдох  354 гомдол, хүсэлтийг хүлээн авч, мөрдөн шалгах ажиллагааны явцад нийт 861 тэрбум 311 сая 742 мянга 323 төгрөгийн хохирлыг нөхөн төлүүлжээ.

Уг хэргийг 2022 оны 11 дүгээр сарын 4-ний өдөр шүүхэд шилжүүлэх саналтай прокурорын хяналтад шилжүүлсэн бөгөөд одоогоор Улсын дээд шүүхэд хянагдаж байгаа аж.

Эх сурвалж: АТГ