УИХ-ын Өргөдлийн байнгын хорооны хуралдаан эхэллээ. Хуралдаанаар 2026 оны төсвийн тодотголын төслийг хэлэлцэж байна. Хуралдааны үеэр УИХ-ын гишүүн Д.Ганмаа эрүүл мэндийн салбарын өр төлбөртэй холбоотой асуудлыг хөндлөө. Тэрбээр эрүүл мэндийн сан өргүй болсон ч эмнэлгүүд өртэй хэвээр байгааг тодотгоод, үүнийг ямар бодлогоор зохицуулж байгаа талаар асуув.

Үүнд ЭМЯ-ны Төрийн нарийн бичгийн дарга С.Эрдэнэбат хариулт өглөө. 
Тэрбээр “Эрүүл мэндийн салбарын хэмжээнд энэ оны наймдугаар сарын 3-ны өдрийн байдлаар нийт 205 орчим тэрбум төгрөгийн өр төлбөр үүсээд байна. Үүний 61.9 тэрбум төгрөг нь татвар, нийгмийн даатгалын өр. 

Өнгөрсөн онд эрүүл мэндийн салбарын нийт өр 240 тэрбум төгрөг, авлага нь 141.1 тэрбум төгрөг байсан. Одоогоор төдийлөн буураагүй харагдаж байгаа ч оны эцэс гэхэд өр төлбөр нэлээд буурна” гэв.

Мөн хуралдааны үеэр УИХ-ын гишүүн Х.Баасанжаргал боловсролын салбарын төсөвтэй холбоотой асуудлыг хөндлөө. Тэрбээр “Улсын сургуулийн сурагчид сурах бичиггүй байхад яагаад хувийн хоёр сургуульд тоног төхөөрөмжийн зардалд 7 тэрбум төгрөг төсөвлөсөн бэ? Төр яагаад өөрийн мөнгөөр боловсролын тэгш бус байдлыг үүсгээд байна вэ?” хэмээн асуув.

Үүнд Боловсролын яамны Эдийн засаг, санхүү, бодлогын газрын дарга Н.Мөнх-Оргил хариуллаа.
Тэрбээр “Төрөлжсөн ахлах сургуулийг дүүрэг бүрт, цаашлаад аймаг бүрт байгуулахыг зорьж байна. Байгалийн шинжлэх ухааны лабораторийн тоног төхөөрөмжид 15 тэрбум төгрөг төсөвлөсөн. Төсөвт багтсан хоёр хувийн сургуульд тоног төхөөрөмжийг түр ашиглуулна” гэв.

Мөн хуралдааны үеэр УИХ-ын гишүүн О.Саранчулуун хөгжлийн бэрхшээлтэй иргэдийн хөдөлмөр эрхлэлтийн асуудлыг, УИХ-ын гишүүн Ж.Галбадрах төсөв тодотгох болсон шалтгааныг Үндэсний аудитын газраас тодруулахын зэрэгцээ цэцэрлэг, сургуулийн барилгын чанарын асуудлыг тус тус хөндлөө.