“Говийн бага дархан цаазат газрын экосистемийн онцлог, биологийн олон янз байдал” сэдэвт эрдэм шинжилгээний хурал өнөөдөр /2026.10.28/ зохион байгуулагдаж байна.

БОУАӨЯ, Говийн бага дархан цаазат газрын хамгаалалтын захиргаанаас зохион байгуулж буй тус арга хэмжээнд байгаль орчны салбарын эрдэмтэн судлаачид, мэргэжлийн байгууллагын төлөөлөл, байгаль хамгаалагчид оролцож байна.

Хурлаар тус газрын экосистемийн онцлог, биологийн олон янз байдлын төлөв байдал, ховор болон нэн ховор амьтан, ургамлын хамгаалал, судалгаа, мониторингийн үр дүнг хэлэлцэж байна.

Мөн ургамлын бүрдэл, шувуудын зүйлийн олон янз байдал, тархалт, тоо толгой, хамгааллын асуудлыг хөндсөн судалгааны ажлуудыг танилцуулна. 

Хурлыг Байгаль орчин, уур амьсгалын өөрчлөлтийн сайд Ц.Сандаг-Очир нээж хэлсэн үгэндээ Монгол Улсын нийт нутаг дэвсгэрийн 20.8 хувь буюу 32.8 сая га талбайг улсын тусгай хамгаалалтад хамруулж, нэгдсэн сүлжээг бүрдүүлээд байгааг онцоллоо.

Тэрбээр Монголын говь нь уур амьсгалын эрс тэс нөхцөлд дасан зохицсон олон зүйл амьтан, ургамлын амьдрах орчин төдийгүй шинжлэх ухааны судалгаа, танин мэдэхүйн өндөр ач холбогдол бүхий өвөрмөц экосистем болохыг тэмдэглэв.

Уур амьсгалын өөрчлөлт, цөлжилт, газрын доройтол, усны нөөцийн хомсдол, биологийн олон янз байдлын бууралт зэрэг хүчин зүйл говийн эмзэг экосистемд үзүүлэх нөлөө нэмэгдэж буй энэ цаг үед байгаль хамгааллын бодлого, шийдвэрийг шинжлэх ухааны судалгаа, бодит мэдээлэл, тогтмол мониторингийн үр дүнд тулгуурлан гаргах шаардлагатайг мөн тодотголоо. 

Говийн бага дархан цаазат газрын хамгаалалтын захиргаа нь байгуулагдсанаас хойшхи 20 жилийн хугацаанд байгалийн унаган төрх, биологийн олон янз байдлыг хамгаалах, судалгаа, мониторинг хийх, хууль тогтоомжийн хэрэгжилтийг хангах, орон нутгийн иргэдийн оролцоог нэмэгдүүлэх чиглэлээр ажиллаж ирсэн юм.

Тиймээс өнгөрсөн 20 жилийн хугацаанд хуримтлуулсан судалгаа, мэдээлэл, туршлагад тулгуурлан ирэх 20 жилийн хамгаалалтын зорилго, бодлого, менежментийн шинэ арга замыг тодорхойлох нь тус хурлын гол ач холбогдлын нэг гэдгийг хуралд оролцогчид онцоллоо. 

Эрдэм шинжилгээний бага хурлын үеэр байгаль хамгааллын салбарт үнэтэй хувь нэмэр оруулсан зарим албан хаагчдад төрийн дээд одон медаль болон салбарын хүндтэй шагнал гардууллаа.

Эх сурвалж: Байгаль орчин, уур амьсгалын өөрчлөлтийн яам