"Иргэдийн нэхэх эрх" гэх төрийн бус байгууллагыг байгуулж буй иргэн Х.Алтанхуяг өнөөдөр Засгийн газрын есдүгээр байрны (Төрийн өмчийн бодлого зохицуулалтын газар) урд хэвлэлийн хурал зарлаж мэдээлэл хийлээ. Тэрээр ЖДҮ-ийн зээлийг өөрийн хамаарал бүхий компанидаа авсан гэгдэж буй гишүүдийг мөнгөө эргүүлж төлөхийг шаардаж буй юм.

Х.Алтанхуяг "Өчигдөр бид зах дээр ажилладаг жижиг дунд үйлдвэрлэгчидтэй уулзлаа. Тэд үнэхээр бухимдалтай байгаа ба хэдэн тэрбумаар нь хүсээгүй. Аравхан хүнтэй үйлдвэрээ хөгжүүлчихмээр байна гэж хэлж буй. Бид нэгдүгээрт ЖДҮХС-аас мөнгө завшсан их хурлын гишүүд мөнгөө эргүүлж тушаагаагүй учраас эргүүлж тушаахыг шаардаж байна. Мөнгөө тушаагаагүй гишүүдийг албан ёсоор зарлах ёстой. Хоёрдугаарт УИХ-ын дарга, гишүүд өөрсдөдөө хариуцлага тооцох ёстой. Үүнд нь Ерөнхийлөгч Х.Баттулга хяналт тавьж ажиллахыг шаардаж буй. Гуравдугаарт, хэрэв нэг ч мөнгө тушаахгүйгээр нуун дарагдуулна гэж бодож байгаа бол бид шүдний өвчин шиг, ясаа цайтал үзнэ. ЖДҮ-ийн зээлийг авсан, нэр дэвшиж буй гишүүний тойрогт очиж сонгогчдоор мөнгийг нь нэхүүлнэ.

Бид бичиг цаас барьж гүймээргүй байна. Бид зүгээр л хэвлэл мэдээллээр нээлттэй хэлнэ, шаардлагаа нээлттэй хүргүүлнэ. Мөн "ЖДҮ-чид" та нар хар дансанд орсон шүү гэдгийг харуулах гэж бид ийм ном гаргасан" гэв.

Түүний хэлснээр ТББ нь албан ёсоор байгуулагдаагүй байгаа ба өчигдөр Улсын бүртгэлийн ерөнхий газарт бичиг баримтаа өгсөн аж.

Тэрээр мөн "Бид фэсбүүкээр хоорондоо ярилцаад ЖДҮХС-гийн асуудал мартагдах гэж байгаа учраас эргээд сөхөж, ярихаар ТББ байгуулах шийдэлд хүрсэн. Гэвч анхнаасаа бэрхшээлтэй тулгарч байна. Уг нь 1000 төгрөг төлөөд л ТББ-ынхаа нэрийг авдаг. Гэтэл нэр өгөхгүй байна. Нэр авахын тулд даргад хүсэлт гарга гэсэн хүнд суртлыг үзүүлж буй" хэмээн ярьсан юм.