СЕХ-ноос автоматжуулсан системд ашиглах программ хангамж, техник хэрэгслийн ажиллагааг шалган туршиж, баталгаажуулах ажлыг нам, эвсэл, төрийн бус байгууллага, сэтгүүлч, олон нийтэд нээлттэй зохион байгууллаа.

2024 оны ээлжит сонгуулиар 2198 хэсгийн хороонд 2943 санал тоолох төхөөрөмж ашиглана.

Нам, эвсэл болон төрийн бус байгууллагуудын төлөөлөл дээрх үйл ажиллагааг ажиглахаас гадна санал тоолох төхөөрөмжийн үйл ажиллагааг туршсан юм. Тухайлбал, санал тоолох төхөөрөмжүүдээс сонгон бүрдэл бүрийг шалган саналын хуудас уншуулж, үйл ажиллагааг нь нэг бүрчлэн туршиж мөн индүүдэж шалгав.

Сонгогчийн санал авах, тоолох, дүнг гаргах үйл ажиллагаанд “New Image Cast” санал тоолох төхөөрөмжийг хэрэглэдэг. Санал тоолох төхөөрөмж нь санах ойн төхөөрөмж (CF карт), саналын хайрцаг, нөөц тэжээл, хамгаалалтын соронзон түлхүүр, тэжээлийн залгуур, модем, зөөврийн хуванцар цүнхнээс бүрддэг бөгөөд бүрдэл бүрийг ажиглагчид хянаж, туршлаа.

Энэ үеэр СЕХ-ны нарийн бичгийн дарга Д.Бат-Эрдэнэ "СЕХ болон аймгийн сонгуулийн хороод тагнуул, цагдаагийн байгууллагын бүрэлдэхүүнтэй хамтран санал тоолох төхөөрөмж, саналыг хуудсыг авч явахад бэлэн боллоо. Мэргэжлийн байгууллагууд шалгаж баталгаажуулсны дараа сонгуульд оролцогчдоор баталгаажуулж буй ажил ажил" гэлээ. 

УИХ-ын 2024 оны ээлжит сонгуулиар санал авах ажиллагаа дууссаны дараа бүх хэсэгт 100 хувь хяналтын тооллого (гар тооллого) хийнэ. Хяналтын тооллого хийх ажиллагаа ажиглагч, хэвлэл мэдээллийн байгууллагын болон сонгогчдын төлөөлөлд нээлттэй гэдгийг СЕХ онцлов.

Сонгуулийн ерөнхий хорооны Мэдээллийг технологийн төв, Цахим хөгжил, харилцаа холбооны яам, Тагнуулын ерөнхий газрын төлөөлөл оролцсон Ажлын хэсэг Сонгуулийн автоматжуулсан системд ашиглах программ хангамж, техник хэрэгслийн ажиллагааг шалган туршиж, баталгаажуулан гэрчилгээ олгосноор хэсгийн хороодод хүргүүлдэг.

Саналыг хуудсыг сонгогчдын тоонд үндэслэсэн нөөцтэйгөөр хэвлүүлснийг хэсгийн хороодод тагнуул, цагдаагийн байгууллагын хяналттайгаар хүргүүлэх аж.