Миний Монгол экспедиц нэвтрүүлгийн шинэ дугаар GOGOTV буланд  нэмэгдлээ.

Жилээс жилд өөрчлөгдөн хувьсаж буй байгаль орчин, сараас сард холдон бүдгэрч буй нүүдлийн соёл, заншил, өдрөөс өдөрт орхин одож буй өтгөс буурлын сургаал. Энэ бүгдийг гэрэл зураг, дүрс бичлэгээр мөнхлөн хойч үедээ өвлүүлэн үлдээхийг зорьсон Миний Монгол Экспедицийн энэ удаагийн дугаарыг та бүхэндээ хүргэж байна.

Аяллын баг Увс, Баян-Өлгий, Ховд аймгийн нутгаар 23 000 км замыг туулж 75 хоног хээрийн зураг авалт хийхдээ хүний хөл хүрэх бэрх газар нутгийг сонгож нийт 17 000 гэрэл зураг, 6 000 минутын дүрс бичлэгийн санг бүтээжээ.

Энэ удаагийн дугаарт аяллын баг Говь-Алтай аймгийн Сутай хайрханы хормойд зусах н.Болдынд зочилжээ. Монгол ахуйн аж байдал, нэг өдрийн амьдрал зэргийг уншигч та бүхэндээ сонирхуулан бэлтгэжээ. Болдынх хорь гаруй сарлагтай аж. Сарлаг нь манай орны 13 аймаг 132 суманд тархсан байдаг гэнэ. Энэхүү амьтныг монголчууд сарлаг, киргизүүд топоз, түвдүүд яга гэж нэрлэдэг бөгөөд зэрлэг сарлаг одоо ч түвдийн нутагт байдаг аж.

Мөн Ховд аймгийн Цэцэг сумын өндөр настан Д.Чойсүрэн вансэмбэрүү хэмээх ховор цэцгийн талаар болон нутгийнхаа байгалийн сайхныг хуучилсан байна. Сонирхуулахад вансэмбэрүү цэцэг нь улаан номонд орсон ургамал бөгөөд үрийг нь гадаад руу гаргахыг 1974 онд олон улсын конвенциос хориглосон байдаг аж.

Хэрэв та бүхэн  Миний Монгол экспедиц - Баруун Монголд цувралын энэ удаагийн дугаарыг үзэхийг хүсвэл ЭНД дарна уу.  

Эх орныхоо байгалийн үзэсгэлэнт газар, онгон байгаль, гайхалтай тогтоц бүхий газруудыг даяаршлагдаж байгаа энэхүү цаг үед бид илүү их хайрлан хамгаалах, хүндэтгэн дээдлэх цаг ирснийг энэхүү цуврал нэвтрүүлгүүд танд бэлхнээ сануулах болно.