Нийслэлд зам засвар шинэчлэлийн ажил үргэлжилсээр байгаа билээ.

Нийслэлийн автозамын газрын захиалгаар хийгдэж байгаа 39-р сургуулийн уулзвараас “Хүчит шонхор” зах хүртэлх 700 метр авто замын засварын ажил өнөөдөр дуусч, хөдөлгөөнийг 23:00 цагаас нээх юм байна.

“Хүчит шонхор” захаас “Нарантуул-2” захын далан дагасан зам хүртэлх 400 метр замыг үргэлжлүүлэн 10 хоног хааж хучилтын ажил хийхээр төлөвлөжээ.

Мөн “Зүүн 4 зам”-ын уулзварын зүүн талын хойд урсгалд 100 метр замын хөдөлгөөнийг өнөө орой 22:00 цагт хааж, хучилтын ажлыг гүйцэтгэж, есдүгээр сарын 25-ны 22:00 цагт нээхээр болсон байна.

Харин Гудамж төслийн хүрээнд Гэмтлийн эмнэлгээс доош уруудсан замыг I хорооллын арын замтай холбох ажлын явц 53 хувьтай байгаа бөгөөд зам засварын ажлыг "Экспрессзам" ХХК гүйцэтгэж байна.

Зам засварын ажил гэрээ ёсоор аравдугаар сарын 15-ны өдөр дуусна. Харин 25-р эмийн сангийн уулзварын өргөтгөл шинэчлэлтийн ажил 75.2 хувьтай байгаа аж.

Яармагийн замыг "Атар Өргөө" ХК-ийн урдаас ТЭЦ-3-ын уулзвар хүртэл "Наранбулаг Хан" ХХК засаж, гэрээт хугацаагаар арваннэгдүгээр сарын 10-нд хүлээлгэн өгнө.

Харин ТЭЦ3-ын уулзвараас Яармагийн гүүр хүртэлх замын өргөтгөл шинэчлэлтийн ажлыг  аравдугаар сарын 15-ны өдөр нээх гэрээтэй боловч өнөөдөр асфальт хучилтаа хийснээр төлөвлөж байсан хугацаанаас өмнө ашиглалтад өгөхөөр болжээ.

Г.Од