УИХ-ын Хүний хөгжил, нийгмийн бодлогын байнгын хорооны хуралдаан өчигдрийн /2026.09.09/ хуралдаанд УИХ-ын гишүүн П.Наранбаяр нэгдүгээр ангийн сурагчдын сургалтын шинэчилсэн хөтөлбөртэй холбоотой асуудлаар асуулт тавилаа. 



П.Наранбаяр, Нэгдүгээр ангийн хүүхдүүд сурах бичиггүй, “Би сурагч боллоо” гэсэн цэцэрлэгийн хүүхдийнх шиг дэвтэртэй байж байна. Сурах бичгийг 10-р сарын 1-нээс үзэж эхэлнэ гэж байна. Сурах бичгийг хугацаандаа хэвлэж амжих уу?

Боловсролын яамны Төрийн нарийн бичгийн дарга Т.Ням-Очир, 2026 оны 2-р сарын ЕБС-ийн 1-5-р ангийн сургалтын хөтөлбөр шинэчлэн батлагдсан. Үүнтэй холбоотойгоор 1-р ангийн сурагчид шинэчилсэн хөтөлбөрөөр хичээлээ үзнэ. Шинэчилсэн хөтөлбөрөөр нэгдүгээр ангийнхан эхний  долоо хоног буюу нэг сарын хичээлийг сургуульд дасан зохицох хөтөлбөр оруулсан. Хуучин 60-80 цагийн бэлтгэх хөтөлбөр орж байсан.  

Эхний 1-2 долоо хоног сургууль, анги хамт олонтойгоо танилцах, гурав дахь долоо хоногт “Би сурагч боллоо” , 4 дэх долоо хоногт “Би сурч чадна” гэсэн агуулгын хүрээнд хөтөлбөр боловсруулсны дагуу хичээл орж байна.

П.Наранбаяр, Долоо хоног сургуультай, тэгээд долоо хоног ангитайгаа танилцана гэж юу гэсэн үг юм бэ. Хичээлийг нь заахгүй бол 10 сарын 1-нээс ачаалал нь улам нэмэгдэнэ.

Т.Ням-Очир, Сургалтын хөтөлбөр шинэчлэгдсэнтэй холбоотой агуулгад тодорхой хэмжээний өөрчлөлтүүд гарсан. Шинэ агуулгын хүрээнд сурах бичиг зохиох, хэвлэх ажлууд үргэлжилж байна.