УИХ-ын гишүүн Ж.Галбадрах боловсролын салбарын лобби бүлгийг байгуулсан. Тэрээр сургууль цэцэрлэгийн хүртээмж хангалтгүй байгааг байнга шүүмжилдэг бөгөөд Хан-Уул дүүргийн ЕБ-ын 7-р сургуулийн барилгын талаар дараах мэдээллийг өглөө. 

7-р сургуулийг 1972 онд барьснаас хойш өдгөө 56 жил болж байна. Энэ сургууль 350 хүүхдийн хүчин чадалтай. Мэргэжлийн хяналтын газраас тус сургуулийн барилгыг ашиглах боломжгүй гэсэн дүгнэлт гаргасан ч өөр хичээллэх байр байхгүйн улмаас өнөөдрийг хүртэл үйл ажиллагаагаа явуулсаар байна.

Хоёр жилийн өмнө тус сургуулийн 480 хүүхдийн хүчин чадалтай өргөтгөлийн барилгын ажил эхэлсэн ч сууриас хэтрэлгүй өдийг хүрчээ. Барилгын гүйцэтгэгчээр ажиллаж байгаа "Гранд Марз" компани нь өмнө нь сургуулийн барилга барьж байсан туршлагагүй бөгөөд барьсан ганц 335-р цэцэрлэгийн хана нь хагардаг, хэл амтай баригдсан ч энэхүү тендерт шалгарчээ.

Энэхүү компанийн захирал нь утсаа ч авахгүй алга болоод уджээ. 7-р сургуулийн барилга хуучин учир анги танхим маш жижиг, агаарын солилцоо үнэхээр хангалтгүй. 2026-2027 оны хичээлийн жилд 2425 гаруй сурагчтай хичээл сургалтын үйл ажиллагааг явуулж байна.

Хичээлийн үндсэн 350 хүүхдийн суудалтай байр, зориулалтын бус түрээсийн 840 хүүхдийн суудалтай 2 байранд хуваагдан 1-р ээлжид 1140, хоёрдугаар ээлжид 1285 суралцагч хичээллэж байгаа төдийгүй дундаж анги дүүргэлт 38-40 байна.

Хичээлийн үндсэн байр болон түрээсийн байр хоорондоо 1.5км зайтай. Спорт заалны хүртээмж муу учир түрээсийн байранд суралцдаг хүүхдүүд зааланд тоглох боломжгүй.  Хичээлийн үндсэн байрны спорт заал нь сендвич хавтангаар тусдаа баригдсан учир хичээлийн байрнаас гадагш гарч зааландаа ордог ажээ.

Нийт 65 бүлгийн 30 нь 40-өөс дээш сурагчтай. Бага ангийн хувьд тусад нь гаргажээ. Үдийн цай, хоол байхгүй тул хүүхдүүд нь 3х3=9м2 умгар өрөөнд буфетэээр үйлчлүүлдэг. Сургуулийн хамт олон, сурагчид өргөтгөл барилгаа ашиглалтад орохыг нүдээ чилтэл хүлээсэн. Гэвч өргөтгөл барилгыг хариуцах эзэнгүй хөсөр хаягдсан дүр зурагтай өнөөдрийг хүрч байна.

Сурагчдын эрх ноцтой зөрчигдөж байгаа энэ асуудалд Боловсролын яам болон холбогдох газрууд нэн яаралтай анхаарал хандуулж, арга хэмжээ авахыг шаардаж байна.

Бидний гаргасан шинээр барих 108 сургуулийн 1-рт энэ сургууль эрэмбэлэгдсэн. Стандартын дагуу сургуулиудаа шуурхай барьж байж хүртээмжийг шийдэх ёстой. Одоогийн байдлаар 22 сургууль, 11 цэцэрлэг барих хөрөнгө оруулалтыг шийдсэн ч Боловсролын яамнаас ирэх онд нэг ч сургууль шинээр барихгүй гэсэн төсөв боловсруулсанд туйлын харамсалтай байна гэв.

"ГРАНД МАРЗ"  КОМПАНИЙГ ХЭН ЭЗЭМШДЭГ ВЭ?