Мексикийн хар тамхины нэрт бүлэглэлийн толгойлогч Немесио Осегера Сервантес буюу “Эль Менчо”-г гэр бүлийнхэн нь даваа гарагт алтадсан авсанд оршуулжээ.

Түүний булш бусад хар тамхины толгойлогчдынх шиг сүрлэг бунхан бүхий биш, харьцангуй даруухан байжээ. 

Тэрбээр хоёрдугаар сарын сүүлчээр баривчлахаар очсон Мексикийн тусгай хүчнийхэн болон түүний бие хамгаалагчдын хооронд болсон буудалцаанд шархадсаны улмаас амиа алдсан юм.

59 настай тэрбээр айдас төрүүлэм Халискогийн Шинэ Үеийн Картел (CJNG) бүлэглэлийг үүсгэн байгуулагч бөгөөд Мексикийн хамгийн их эрэн сурвалжлагдаж байсан этгээд байв. АНУ түүнийг баривчлахад туслах мэдээлэл өгсөн хүнд 15 сая ам.долларын шагнал амлаж байсан юм.

Түүний үхэл Мексикийн 20 мужид өргөн хэмжээний хариу хүчирхийллийг өдөөжээ. Картелийн гишүүд автомашинуудыг шатааж, замуудыг хаасан байна.

Халиско мужийн Гвадалахара хотын ойролцоох оршуулгын үеэр дахин эмх замбараагүй байдал дэгдэхээс сэргийлэхийн тулд Үндэсний гвардийн алба хаагчид их хэмжээгээр хамгаалалтад гарчээ. Энэ бүс нутаг нь картелийн гол түшиц газар аж.

Бүх цэцгийн баглааг оршуулгын газарт хүргэхэд таван ачааны машин шаардлагатай болжээ

Ёслолын өмнө том хэмжээний цэцгийн баглаануудыг оршуулгын газарт зөөж оруулсан бөгөөд тэдгээрийн дунд тахиа хэлбэртэй баглаа байсан нь түүний азарган тахианы зодоонд дуртай байсныг илтгэжээ.

Бүх цэцгийн баглааг оршуулгын газарт хүргэхэд таван ачааны машин шаардлагатай болсон бөгөөд ихэнхийг нь нэрээ нууцалсан хүмүүс илгээсэн байна.

Орон нутгийн хэвлэлүүдийн мэдээлснээр, алтан өнгийн авсыг оршуулгын газрын сүмд оруулж ирэх үед уламжлалт “El Muchacho Alegre” (“Хөгжилтэй хүү”) дуу эгшиглэж байсан байна.

Нэг цаг орчим үргэлжилсэн ёслолын дараа, нүүрээ маскаар халхалсан олон хүн гашуудлын цуваанд ахлан, авсыг даган булш руу нь хүргэжээ. Мексикийн хэвлэлүүдийн тэмдэглэснээр түүний булш бусад хар тамхины толгойлогчдынх шиг сүрлэг бунхан бүхий биш, харьцангуй даруухан байсан аж.

Эх сурвалж: BBC