Улсын Нэгдүгээр Төв эмнэлгийн Гастроэнтерологийн төвийн эмч, Анагаах ухааны доктор Г.Анар зөв хооллож эрүүл мэндээ хамгаалах талаар зөвлөгөө өгч байна.

Тэрбээр, Томоохон баяруудын дараа манай тасгийн ачаалал нэмэгддэг. Хооллолтын дэглэм алдсанаас цөсний хүүдий үрэвсэх, нойр булчирхай болон гэдэс хэвлийгээр өвдсөн гэх зовуурьтай хүмүүс ирдэг. Энэ нь голдуу өөх тос ихтэй хоол идсэн, архи дарс хэтрүүлэн хэрэглэсэн зэрэг хоололтын дэглэм алдсантай холбоотой. Хүн бүхний хоол боловсруулах явц өөр өөр. Гэвч монголчуудын нийтлэг асуудал ислэг багатай хүнс хэрэглэдэг. Үүнээс болж өтгөн хатах, зовуурилах, цагаан мах эргэдэг бол цус гарах зэрэг зовуурь илэрнэ.

Үүнээс сэргийлэхийн тулд хүнсний ислэгээр баялаг буюу ширхэгтэй хүнс сайн хэрэглэх хэрэгтэй. Ислэгээр баялаг лууван, манжин, арвайн гурил, шош, жимс түлхүү хэрэглэвэл дээрх эмгэгүүдээс сэргийлж болно.

Амьтны гаралтай өөх тос буюу тасалгааны температурт царцдаг хүнс хэрэглэснээс цусны найрлагад тэнцвэр алдагдан тундасжиж, өтгөрөн элсжиж, чулууждаг. Чулуу нь цөсний сувагт гацах, ноор булчирхай өвдөх зэрэг хүндрэл үүсгэдэг. Энэ бүхнээс сэргийлэхийн тулд аль болох өөх тос багатай хүнс хэрэглэ.

Хоол идсэний дараа хэвлийгээр бүсэлхийлж өвдөж байна гэдэг зовуурь түгээмэл илрэх бөгөөд энэ нь голдуу нойр булчирхайн архаг үрэвсэлтэй холбоотой. Энэ үрэвсэл нь монгол уламжлалт хоол хүнсийг олон жилийн турш хэрэглэснээс нойр булчирхай өөхөлж, ачааллаа дийлэхээ больсонтой холбоотой өвдөж болно. Үүнээс сэргийлэхийн тулд дээр дурьдсан хүнс хэрэглэх, өвдөлт намдахгүй бол эмчийн заавраар эм уухыг зөвлөж байна.