Ойрын өдрүүдэд ихэнх нутгаар хур бороо элбэг байх тул гол мөрний усны түвшин тухайн хугацаанд орсон хур борооны эрчимжил хэмжээнээс шалтгаалан эрчимтэй нэмэгдэж байна.

Өнөөдрийн байдлаар Хөвсгөлийн уулсаас эхтэй Эг, Үүр, Зэлтэр, Хэнтий нурууны баруун хажуугаас усжих Туул гол (Улаанбаатар хот болон Алтанбулаг сум), Хараа, Ерөө, зүүн хажуугийн Барх, Эг, Балж, Онон, Хэрлэн, Хангай нурууны араас усжих Орхон, Урдтамир, Хөгшин Орхон, өврийн Байдраг, Шаргалжуут, Онги (Арвайхээр, Сайхан-Овоо сум), Таац, Зэгстэй, Увс нуурын савын Намир зэрэг голуудын усны түвшин өмнөх өдрөөс 10-70 см нэмэгдсэн байна.

Тэрэлж, Туул (Улаанбаатар хот, Лүн сум), Сөгнөгөр, Балж, Байдраг (Бууцагаан сумын Баянбүрд баг), Таац, Хөгшин Орхон, Хархираа (Тариалан сум) Намир (Өмнөговь сум) зэрэг голууд үерийн түвшинг 5-45 см давсан байдалтай хүчтэй үерлэж байна.

Маргааш буюу 31-нд Туул гол Улаанбаатар хот орчимд усны түвшин 35 см, Алтанбулаг сум орчимд 25 см, Хэрлэн гол Багануур дүүрэг орчимд 10 см, Ерөө гол Дулаанхаан сум орчимд 15 см, Онон гол Дадал сум орчимд 30 см тус тус нэмэгдэх төлөвтэй байна.

Иймд дээрх голууд болон гол мөрний сав дагуу аялж, амарч яваа иргэд үерийн аюулаас сэрэмжтэй байхыг анхааруулж байна.

Жолооч та гол мөрөн үерлэсэн үед баталгаагүй зам, гармаар зорчихгүй байх, эвдрэл үүссэн байж болзошгүй баталгаагүй гүүр, далан дээгүүр явахаас татгалзах, автомашинаа голын эрэг, гуу жалга, үерийн амнаас хол, аюулгүй газарт байрлуулж үер усны аюулаас болгоомжлоорой. 

Эх сурвалж: ЗТЯ