УИХ-ын Төрийн байгууллалтын байнгын хороо хуралдаж байна. Хуралдаанд Ерөнхийлөгчийн Тамгын газраас Н.Учралыг Ерөнхий сайдаар томилох саналыг танилцуулж байна. Танилцуулгыг ЕТГ-аас хийлээ. 

ТӨГССӨН СУРГУУЛЬ, МЭРГЭЖИЛ

• 2003 онд Их Засаг лицей сургууль, бүрэн дунд боловсрол
• 2007 онд Их засаг олон улсын их сургууль, эрх зүйч
• 2010 онд Британийн Лимкоквин их сургууль,Бизнесийн удирдлагын магистр
• 2012 онд Монгол Улсын Боловсролын их сургууль, түүхийн ухааны магистр
• 2019 онд Британийн Глоустершер их сургууль, Олон улсын менежмэнтийн магистр
• 2013 онд ОХУ-ын ШУА-ийн Сибирийн салбарын Монгол,Түвд ,Будда судлалын институт, Түүхийн ухааны доктор /PhD/зэрэг

АЖИЛЛАСАН БАЙДАЛ

• 2007-2008 онд Их засаг олон улсын их сургуулийн ТУЗ-ийн дэд дарга
• 2010-2016 онд Рояаль Академи, Рояаль олон улсын дээд сургуулийн үүсгэн байгуулагч, ерөнхий захирал
• 2012-2014 онд Нийслэлийн Монгол ардын намын хорооны улс төрийн хэлтсийн дарга
• 2015 онд Засгийн газрын Хэрэг эрхлэх газарт Монгол улсын Шадар сайдын ажлын алба, Шадар сайдын олон нийттэй харилцах бодлогын зөвлөх
• 2016 онд Улсын Их Хурал дахь Монгол ардын намын бүлгийн зөвлөх
• 2010 оноос Монголын Франчайзингийн Ассоциацийн ерөнхийлөгч
• 2015 оноос НАМЗХ-ны дэд ерөнхийлөгч
• 2015 оноос Монголын залуу багш нарын холбооны ерөнхийлөгч
• 2019 оноос НАМЗХ-ны ерөнхийлөгч
• 2016-2020 онд Монгол Улсын Их Хурлын гишүүн
• 2018-2020 онд Цахим бодлогын түр хорооны дарга
• 2020-2024 онд Монгол Улсын Их Хурлын гишүүн
• 2020-2022 онд Монгол Улсын Их хурлын Инновац, цахим бодлогын байнгын хорооны дарга
• 2022-2024 онд Монгол Улсын Засгийн газрын гишүүн-Цахим хөгжил, харилцаа холбооны сайд
• 2024 оноос Монгол Улсын Их Хурлын гишүүн
• 2024-2025 онд Монгол Улсын Засгийн газрын гишүүн, Монгол Улсын сайд, Засгийн газрын Хэрэг эрхлэх газрын дарга
• 2025 оноос Монгол Улсын Засгийн газрын гишүүн, Монгол Улсын Тэргүүн шадар сайд бөгөөд Эдийн засаг, хөгжлийн сайд
• 2025 оноос Монгол Улсын Их Хурлын дарга

ШАГНАЛ

• 2015 онд
• Боловсролын тэргүүний ажилтан цол тэмдэг

ГАДААД ХЭЛ

• Англи, Орос

Танилцуулгын дараа ТББХ-ны гишүүдээс нэр дэвшигчээс асуух асуулттай гишүүн байгаа эсэх талаар тодруулахад Л.Гантөмөрөөс өөр хүн асуулт асуусангүй.

УИХ-ын гишүүн Л.Гантөмөр: Цаашид анхаарахгүй бол МАН-ын Бага хурлаас дэвшсэн Ерөнхий сайдыг Ерөнхийлөгч танилцуулна гэдэг цаашдаа болохгүй юм байна. УИХ-д бол бүлгийн дарга ч юм уу оруулж ирдэггүй байхгүй бол парламентын засаглалын хувьд асуудал үүсэж байна. 2024 оны сонгуулийн үр дүнгээр та бүхэн ээлжлээд дарга хийж байна. Сонгуульд дэвшүүлсэн амлалтуудаа Ерөнхий сайд болохынхоо өмнө дахиад бидэнд хэлээд өгмөөр байна. Та нар юу амласан бэ? Амлалтаа мартаад янз бүрийн зүйл рүү үсчээд байхаар төр муухай харагдаж байна. Амлалтыг хэрэгжүүлж гүйцэтгэх учиртай. Өнөөдөр бүгд амлалтаа мартчихсан. Үүнийг маш тодорхой та бүхэн хэлэх хэрэгтэй. Өнгөрсөн 10 сарын хугацаанд олигтой юм хийсэнгүй. 2024-2028 оны Засгийн газрын хөтөлбөрийг боловсруулахад Та бид хоёр олон хоног болсон. Олон ч цаг ярьсан. Эдгээрийг ажил болгох уу. Эгийн гол, босоо төмөр зам, Сүхбаатар аймаг руу явдаг хөндлөн төмөр зам хаачсан бэ?

ТББХ-ны дарга Ц.Сандаг-Очир: Тайлбар хэлье, хуулийн дагуу, Үндсэн хуулийн дагуу явагдаж байгаа. 

Ерөнхий сайдад нэр дэвшигч Н.Учрал: МАН-ын 2024 оны сонгуульд дэвшүүлсэн мөрийн хөтөлбөрт би намын дарга болсныхоо дараа мониторинг хийсэн. AI-д үндэслээд LLM модель боловсруулсан. Бид 5-р сарын 1-н гэхэд олон нийтэд мэдээллийг нээлттэй хүргэх dashboard ажиллуулж эхэлнэ. Засгийн газрын дөрвөн жилийн үйл ажиллагааны хөтөлбөрийг та бид баталсан. Энэ хөтөлбөр биелэх юм бол аль ч намын мөрийн хөтөлбөрийн хэрэгжилт өндөр болно. Тиймээс үнэлгээнүүдийг сар тутам нээлттэй мэдээлэх нь зүйтэй. Цаашдаа мөрийн хөтөлбөрт үнэлэлт, дүгнэлт хийнэ. Миний хувьд тэргүүн шадар сайдаар ажиллахдаа мега төслүүдэд үнэлгээ хийсэн. Заримыг нь түр хойшлуулсан болохоос зогсоосон зүйл байхгүй. Өмнөх Засгийн газруудын хийж хэрэгжүүлсэн ажлуудыг ч үргэлжлүүлээд явна. Мега төслүүдийг УИХ-д аль төслийг хойшлуулах, ямар түвшинд байгаа, аль нь хэрэгцээтэй байгааг ажлаа авсныхаа дараа мэдээлье. 

УИХ-ын гишүүн Л.Гантөмөр: Ардын Намын ялалтын хөтөлбөрийг өөрийнх нь амнаас сонсчихмоор байна. Та хэлэх хэрэгтэй. Сонгуулиар ийм зүйл амласан, ингэж хийнэ гээд хэлэх ёстой. Мега төслүүдэд маш их цаг алдлаа. Ингээд л яваад байвал эрчим хүчгүй, цахилгаангүй, дулаангүй, замгүй, эдийн засаггүй нүүрсний гэмт хэрэг ярьдаг бүлэг этгээд болж хувирах гээд байна. Тиймээс тодорхой хариулт өгмөөр байна. 

Ерөнхий сайдад нэр дэвшигч Н.Учрал: 2024 оны УИХ-ын сонгуулийн мөрийн хөтөлбөрийн дундаж хэрэгжилт 2025 оны жилийн эцсийн байдлаар 33.2 хувьтай байна. Хангалтгүй байна гэж дүгнэж байгаа учраас ажилдаа шуурхайлан орж мөрийн хөтөлбөрөө хэрэгжүүлэх талаар ажиллана. Мега төслүүдийг урагшлуулахад хариуцлагатай бөгөөд шуурхай ажиллана. 

Ерөнхий сайдад нэр дэвшигчид хандаж үг хэлэх эсэх санал хураахад Л.Гантөмөр гишүүнээс өөр үг хэлэх хүн байсангүй. Тэрбээр түүнд хандан чуулганы хуралдааны үеэр асуух асуултаа асууя, та бэлдэж ормоор байна гэв. 

Ням-Осорын Учралыг Ерөнхий сайдад дэмжих эсэх талаар санал хураахад ТББ-ны 24 гишүүний 23 нь дэмжиж, 95.3 хувийн саналаар томилох талаар тогтоолын төслийг чуулганы нэгдсэн хуралдаанаар хэлэлцэхээр боллоо.