УИХ-ын гишүүн С.Амарсайхан Налайх дүүргийн 119 дүгээр сургуулийн газар зүйн багш, Монгол Улсын зөвлөх багш Д.Нэргүй танхимаа хэрхэн тохижуулсантай танилцаж, энэ талаар нийгмийн сүлжээнд нийтэлжээ. Тодруулбал,

"Хүүхдүүд минь энэ танхимдаа нүд нь гялалзсаар орж ирээд, 40 минутад үймүүлэх завгүй хичээлээ үздэг шүү дээ” гэж хэлэн инээмсэглэх Д.Нэргүй багшийн 8 жилийн хөдөлмөр өнөөдрийн энэ жишиг ангийг бүтээжээ.

Д.Нэргүй багш дүүрэгтээ төдийгүй улсдаа ганцхан байх  байгалийн ухааны түшиц кабинетыг 2018 оноос хойш  төсөл бичиж, 8 байгууллагаас 60 орчим сая төгрөгийн санхүүжилт босгон танхимаа тохижуулсан байна. Танхимд,

• төрөл бүрийн газар зүйн макетууд
• VR дэлгэц,  сарны гадарга дуранддаг дуран
• нар сарны хиртэлтийг харуулдаг багаж
• усны эргэлтийг харуулдаг багаж
• дэлхийн дотоод бүтэц болон одны ордыг харуулсан глобус
• улс төрийн глобус
• салхины чиг хурд хэмждэг багаж гэх мэт 6-аас 12 дугаар ангийн хүүхдүүд газар зүй, байгалийн ухааны хичээлийг шимтэн судлах бүх төрлийн хичээлийн хэрэглэгдэхүүнийг бүрдүүлсэн нь бахархал төрүүлж байлаа" гэжээ. 

Мөн УИХ-ын гишүүн С.Амарсайхан хэлэхдээ, "Олон олон инженер, эмч, багш, газар зүй, байгалийн ухааныг шимтэн судлах шинжлэх ухаанчид, эрдэмтэд энэ танхимаас жигүүрээ дэлгэн төрөн гарна  гэдэгт итгэл дүүрэн байна.

Өөрийн хөдөлмөрөөрөө бусдыг үлгэрлэж, ирээдүйн Монгол хүнийг бүтээхэд чин сэтгэл зүрхээрээ ажиллаж байгаа Налайх дүүргийн Ерөнхий боловсролын 119 дүгээр сургуулийн газар зүйн багш, Монгол Улсын зөвлөх багш Д.Нэргүй танд талархал илэрхийлье. 

Цаашид жижиг оврын цаг уурын станц байгуулахад нь хувиасаа болон "Сайнбуян сан"-ийн зүгээс дэмжиж хамтран ажиллана  гэдгээ илэрхийлж байна" гэв.