Туркийн Засгийн газрын урилгаар Истанбул хотноо Дэлхийн Кадастрын их хуралд оролцож буй Монгол Улсын Барилга, хот байгуулалтын сайд Д.Цогтбаатар Туркийн Байгаль орчин, хотжилтын сайд Идрис Гүллүжэ-тэй 2015 оны дөрөв дүгээр сарын 21-нд уулзаж, хоёр улсын барилга, хот байгуулалтын салбарт хамтран ажиллах талаар ярилцав.

Сайд Д.Цогтбаатар Монголын барилгын салбарт Европын стандарт нэвтрүүлэх, хөдөлмөрийн аюулгүй байдлыг хангах талаар Туркийн туршлагыг судалж хэрэгжүүлэх, тус улсын бизнес эрхлэгчдээс Монголд хөрөнгө оруулах, шинэ, дэвшилтэд технологи нэвтрүүлэхэд санхүүгийн болон бусад дэмжлэг үзүүлэхийг хүсэв.

Ноён И.Гүллүжэ Туркийн барилгын салбарын ололт амжилтын талаар товч дурдаад, түүний туршлага, технологийг Монгол Улсад хэрэгжүүлэх талаар хамтран ажиллахад бэлэн байгаагаа илэрхийлэв.

Сайд Д.Цогтбаатар ноён И.Гүллүжэ-г тааламжтай цагтаа Монгол Улсад айлчлахыг урив.
Уулзалт ярилцлагад Монгол Улсаас БНТУ-д суугаа Онц бөгөөд Бүрэн Эрхт Элчин сайд Б.Батхишиг, Истанбул хотод суугаа Ерөнхий консул Э.Мөнх-Очир нар байлцав.