Венесуэлийн ерөнхийлөгч Уго Чавес Гондурасын дотоод хямралт байдал хурцдан, улмаар "Иргэний цуст дайн" болж өргөжиж магадгүй бөгөөд төв Америкийн бусад орныг хамарч болзошгүй гэж Боливын хувьсгалын 200 жилийн ойн баярын үйл ажиллагаан дээр латин америкийн хамтран зүтгэгчдээ хандаж хэлсэн тухай "ИТАР-ТАСС" мэдээлж байна.

Тэрбээр “Гондурасын нөхцөл байдал улам хүндэрч хурцдах боллоо. Төв Америкийг хамарсан иргэний дайнаар төгсөх вий гэж сэтгэл түгшиж байна. Саяхныг хүртэл энэ бүс нутаг халуун цэг байсан бөгөөд өнөөг хүртэл аюул занал нь намжаагүй байна" гэж хэлжээ. Венесуэлийн удирдагч дэлхийн олон нийтэд хандаж цэргийн хууль бус эргэлтийн үр дүнд албан тушаалаас огцорсон тус улсын ерөнхийлөгч Мануэль Селайяг бүх талаар дэмжиж, төрийн эргэлтийн үйл явцыг таслан зогсоохыг уриалсан байна. Уго Чавес цэргийн эргэлтийнхний үйл ажиллагааны ард АНУ байгаа гэдэг санааг дурьдаад “Гондурасын цэргийнхэн энэ улсын тусламж дэмжлэггүйгээр ийм алхам хийж хэзээ ч чадахгүй гэж бодож байна. Хэрвээ цагаан ордны тэргүүн латин америкийн орнуудтай эрх тэгш яриа хэлэлцээ хийхэд бэлэн байгаа бол тус улсаас цэргээ гаргах ёстой" хэмээн мэдэгджээ. Уго Чавесын хэлснээр Гондурасын хууль ёсны ерөнхийлөгч Мануэль Селайя "хүний нутагт тэнэж явснаас төрөлх нутагтаа үхсэн нь дээр" гэж үздэг ажээ.

А.Батсайхан