Манай сонин мацаг барихын гайхамшгийн талаар цуварлаар толилуулж байгаа билээ. Бид өмнөх дугаартаа анхлан мацаг барих талаар бичсэн бол энэ удаад мацгаа үргэлжлүүхэн барих, мөн мацаг тайлах ёсыг танилцуулья.

Мацгийн үе дэх чанд сахилга нь таныг сэтгэлийн тэнхээтэй болгодог. Оройн хоол идсэнээс хойш10-12 цаг болоод бие махбодь өөрийгөө ямар нэг хэмжээгээр цэвэрлэж байдаг бөгөөд хорт хаягдлууд цусанд орж, түүгээр гадагшлуулж байдаг. Хүмүүс өглөө босоод түргэхэн хоол идэхийг яардаг. Чухам энэ байдал нь дээрхи процессыг зогсоодог байна. Зарим хүмүүс бие нь тавгүйтэхэд шөнө дунд босч хоол иддэг.

Өөрөөр хэлбэл тэд хуримтлагдсан хорын шингээлтийг зогсоохын тулд ходоодоо хоолоор дүүргэж байна гэсэн үг. Энэ бүх өөрчлөлт нь хүний биед дотоод цэвэрлэгээ хийхийг шаардаж буй сануулга дохио юм. Хүн хэд хэдэн удаа мацаг барьсны дараа бие нь цэвэршиж эдгээр сулралын мэдрэмжүүд нь арилдаг. Мөн ажлын эрч хүч сэтгэн бодох чадвар буурахын оронд улам нэмэгдэж байгааг илүү мэдрэнэ.

Мацаг яаж тайлах вэ
Мацаг хэрхэн тайлах нь мацаг барихаасаа илүү чухал юм. Та бүх махбодоо амрааж цэвэрлэсний дараа өөх тос махтай хүнд хоолыг ихээр цадталаа идэх юм бол ходоод тань дахин хэт ачаалалд автан мацгийн бүх үр дүн устах болно. Өглөө нар мандсаны дараа давс буюу зөгийн балтай нэг аяга нимбэгний шүүс уух хэрэгтэй. Нимбэгний шүүс нь шүлтлэг бөгөөд бие махбодийг цэвэрлэхэд хамгийн сайн нөлөөтэй. Энэ нь хүчлийг саармагжуулж мацгийн үед эд эрхтнээс цэвэрлэгдсэн бүх зүйлийг устгах төдийгүй, шингээж амархан гадагшлуулдаг. Дараа нь хагас эсвэл бүтэн гадил /банан/ идэхдээ зажлалгүйгээр жижиг жижгээр хазаж шууд залгих хэрэгтэй. Гадил ходоод нарийн гэдсэн дэхь хорыг саармагжуулан, хялбар гадагш хөөнө. Энэ нь хоол боловсруулахад таатай нөхцөл бүрдүүлэн нарийн гэдсииг тосолж байдаг юм. Хэрэв бололцоотой бол өглөөний цайгаа хагас цагийн дараа уувал зохимжтой. Мацгийн дараах анхны хоол хөнгөн чанарын шинэ ногоо жимсээр баялаг байх шаардлагатай. Ялангуяа цэцэгт байцаа, навчит ногоо нь хоол боловсруулах замд үлдсэн хор хаягдлыг шингээж угааж суллана. Ширхэглэг хальстай ногоо нь шүүрдэж цэвэрлэж буй мэт үйлчилнэ. Шүүслэг жимс нь хоол боловсруулах замыг цэвэрлэн хамахад тусална. Өглөөний хоол амархан шингэхүйц хөнгөхөн байх тусам ходоод нарийн гэдсэн дэх үлдэгдэл хор салсыг түргэн гаргадаг. Мацгийн дараах өдөр усанд орохдоо арьсны нүх сүвүүдээр гадагшилсан хор, хог хаягдлыг цэвэрлэхийн тулд биеэ сайтар үрж угаана.

Б.Өлзий