Засгийн газрын ээлжит хуралдаанаар /есдүгээр сарын 23/ нүүрс-пиролизын үйлдвэр барих хамтарсан компани байгуулахаар шийдвэрлэлээ.

Багануурын нүүрсний уурхайг түшиглэн төр, хувийн хэвшлийн түншлэлээр нүүрс-пиролизын үйлдвэр байгуулах, үйл ажиллагааг эрхлэх "Багануур нүүрс-химийн үйлдвэр" ХХК-ийг нийслэлийн өмчит хуулийн этгээдтэй хамтран компанийн нийт гаргасан энгийн хувьцааны 67 хувийг эзэмших нөхцөлөөр байгуулахыг "Чингис хаан баялгийн сан нэгдэл" XXK-ийн Төлөөлөн удирдах зөвлөлд даалгалаа. 

Үлдэх 33 хувийн хувьцаа эзэмшигчийг тогтоох асуудлыг Нийслэлийн иргэдийн Төлөөлөгчдийн Хурлаар шийдвэрлэнэ.

Энэ нь Багануурын нүүрсний уурхайд түшиглэж, 140 сая ам.доллар буюу ₮483 тэрбумын өртөгтэй үйлдвэр байх бөгөөд нийслэлийн агаарын бохирдлыг буруулах зорилготой. Намартаа багтаж сонгон шалгаруулалтыг хийж чадвал 2028 оны эхний хагас жилд бүтээгдэхүүнийг ахуйн хэрэглээнд нийлүүлнэ. Нийт 9 компани саналаа өгөөд байгаа ба ирэх 7 хоногоос сонгон шалгаруулалтыг үе шаттай хийнэ гэлээ.