Ерөнхий мэдээгүйжүүлэгчтэй буюу унтуулгатай хагалгаанд орох үеэр хэрэглэдэг “Фентанил” тариа улсын хэмжээнд тасраад сар гаруй болж байна хэмээн СХД-ийн Нэгдсэн эмнэлгийн эмч Б.Хонгор цахим хуудсандаа мэдээлжээ.

Тэрбээр “Ерөнхий мэдээгүйжүүлэгчтэй (унтуулгатай) төлөвлөгөөт хагалгаанууд орох боломжгүй боллоо. Унтуулгын үеэр хэрэглэдэг зарим тариа (фентанил) тасраад сар орчмын нүүр үзэж байна. Энэ хугацаанд манай эмнэлэгт амь зогоох хэдхэн ширхгийг өгч, өнөөхийгөө хэдэн тасагт дотроо хуваарилж амь зогоож буй үзэгдэл танил боллоо.

Энэ байдал хэдий хүртэл үргэлжлэхийг, ямар арга хэмжээ авч байгаа талаар тодорхой мэдээлэлгүй байна. Уг тариаг зайлшгүй хэрэглэдэг эмнэлгийн ажилчид маань хий дэмий санаа зовсон байдалтай төлөвлөгөөт хагалгаанд орох хүмүүсээ тодорхойгүй хугацаагаар хойшлуулсаар л байна.

Он дуустал энэ байдлаараа байвал яаралтай хагалгааны үед ч тариагүй хэцүү байдалд орохоор болжээ. Ганцхан уг тарианы хомсдолоос үүдэж улс даяараа төлөвлөгөөт хагалгаанууд хойшлох, хүлээгдэл хэт их үүсэх, хүний амь нас эрүүл мэнд цаг хугацааны хүлээгдлээс үүдэж хохирох эрсдэл үүсэж буй. Цаашлаад эмнэлгүүд огт нөөцгүй болчихвол амь тэнссэн үеийн мэс засал хийхэд хэцүү байдал үүсэхийг эрх бүхий хүмүүс нь мэдэж байгаа гэж найдаж байна.

Одоо үүсээд байгаа нөхцөл байдлын талаар Эрүүл мэндийн сайд Э.Батшугар  тодорхой мэдээлэл өгч, яаралтай арга хэмжээ авч ажиллаач хэмээн хүсэж байна. 

Энэ ганцхан Сонгинохайрхан Нэгдсэн эмнэлэгт тохиолдож буй асуудал биш, улс даяар ийм болчхоод байгаа шүү" гэжээ.

Уг тарианы хангамж, нийлүүлэлтийн талаар Эрүүл мэндийн яамнаас тодрууллаа. 

"Улс даяар тарианы нийлүүлэлт хэвийн, тасалдалгүй байна. Өнөөдөр 23 эмнэлэгт эм, хангамжийг нь нийлүүллээ. Сонгинохайрхан дүүргийн Нэгдсэн эмнэлэгт нийлүүлэлт хэвийн үргэлжилж байна. Тус эмнэлэг төлбөрийн өртэй учраас түгээлт багасаж, тасалдал үүсэж байна.

Эрүүл мэндийн яам Засгийн газрын төсвөөс эм, хэрэгслийн төсвийг эмнэлгүүдэд өгдөг. Тиймээс тухайн эмнэлэг менежментээрээ эм хангамжаа тасалдуулахгүй авч явах үүрэгтэй. Төлбөр төлөх хугацаа хэтэрч, их хэмжээний өр үүсвэл тодорхой хэмжээгээр хязгаарлалт хийдэг" хэмээн албаны хүн мэдээллээ.