Эдийн засаг, хөгжлийн яамнаас Азийн хөгжлийн банк (АХБ)-ны Зах зээлийн хөгжүүлэлт, төр-хувийн хэвшлийн түншлэлийн газрын захирал Сидарта Шах болон тус газрын мэргэжилтэн Феран Вила Планас нарыг өчигдөр буюу /2026.03.26. хүлээн авч уулзлаа.

Уулзалтын үеэр талууд Монгол Улсад хэрэгжиж буй болон цаашид хэрэгжүүлэх төр, хувийн хэвшлийн түншлэлийн (ТХХТ) төслүүдийн хэрэгжилтийг эрчимжүүлэх, чанар үр нөлөөг нэмэгдүүлэх чиглэлээр санал солилцож, хамтын ажиллагааг өргөжүүлэх талаар ярилцав.

Азийн хөгжлийн банкны зүгээс Монгол Улсад ТХХТ-ийн чадавхийг бэхжүүлэхэд техникийн болон санхүүгийн дэмжлэг үзүүлэх, түншлэлийн төслүүдийг хөгжүүлэх сангийн хөрөнгийг зээлийн эх үүсвэрээр бүрдүүлэх боломжийг судлах, уг чиглэлээр дэмжин ажиллахаа илэрхийллээ.

Мөн талууд 2026 оны 04 дүгээр сард зохион байгуулагдах Төр, хувийн хэвшлийн түншлэлийн форумыг дэмжин хамтран ажиллахаар тохиролцсон бөгөөд уг форум нь төр, хувийн хэвшлийн хамтын ажиллагааг шинэ шатанд гаргах, хөрөнгө оруулалтыг нэмэгдүүлэхэд чухал ач холбогдолтойг онцлов.

Цаашид хоёр тал ТХХТ-ийн бодлого, эрх зүйн орчныг сайжруулах, төсөл бэлтгэл, санхүүжилтийн механизмийг боловсронгуй болгох, олон улсын сайн туршлагыг нэвтрүүлэх чиглэлээр идэвхтэй хамтран ажиллахаар санал нэгдлээ.

Эх сурвалж: ЭЗХЯ