Нийгэм

ФОТО: 2025 оны онцлох үйл явдлууд ГЭРЭЛ ЗУРАГТ

Г.Өнөболд

Нийгэм

4 цаг 20 минутын өмнө

10

Г.Өнөболд

10

Нийгэм

4 цаг 20 минутын өмнө

Хүмүүний амьдрал урссаар дахин нэг жил, 365 хоногийг бид үдэх нь. Есдүгээр сарын 1 болдгоороо л болж, гэрэлтсэн харцтай багачууд сургуульд элсэж, эгэл энгийн амьдрал үргэлжилжээ. Мөн хүндэт зочид айлчилж, хэн нэгнийг буруутган гэнэтхэн барьж хорьж, хэдэн жилийн өмнө байгуулсан гэрээний буруу, зөвийг 16 жилийн дараа дахин хэлэлцэж, өөр нэгэн хөрөнгө оруулалтын гэрээнд гарын үсэг зурж, Их Эзэн Чингис хааныхаа алтан хөшөөг Италид урлуулан авчирч музейд залжээ. Жагсаж, тэмцэж, омогшиж, хөөрсөн өдрүүдийг бид өнгөрүүлжээ. Бас шатахуунд дугаарлаж, шинэ орд нээж, шинэ Ерөнхий сайдаа томилж, тэгснээ огцруулж, буцаан ажлыг нь хийлгэж, ер будлимаар олон ч үйл явдлын гэрч болжээ, бид. Ингээд Монгол Улсад өнгөрч буй 2025 онд өрнөсөн онцлох үйл явдлыг гэрэл зургаар тоймлон хүргэж байна.

Монгол Улсын Засгийн газраас “Бадрах Энержи” ХХК-ийн хөрөнгө оруулагч, Бүгд Найрамдах Франц улсад бүртгэлтэй “Орано Майнинг” компанитай байгуулах Хөрөнгө оруулалтын гэрээнд гарын үсэг зурлаа. (2025.01.07)

“Чингис хаан” музейд Их хааны алтан хөшөөг заллаа. Хөшөөг Италийн Флоренци хотын “Art’u di Gaetano Salmista” хүрлийн үйлдвэрт цутгажээ. (2025.03.01)

“Ноорог” медиа агентлагийн ажилтнуудыг цагдаагийн байгууллагаас саатуулж, ажлын байранд нь нэгжлэг хийн гар утас, компьютерын хардыг хураан авав. (2025.03.18)

Монгол, Хятадын Гашуунсухайт–Ганцмод боомтын хил дамнасан төмөр замын бүтээн байгуулалтыг эхлүүлэв. (2025.05.14)

Бэрийн тансаглалаас эхлэлтэй шүүмжлэл “Огцрох амархан” жагсаал болон өргөжиж Монгол Улсын 32 дахь Ерөнхий сайд Л.Оюун-Эрдэнэ огцорлоо. (2025.06.03)

Г.Занданшатарыг Монгол Улсын 34 дэх Ерөнхий сайдаар томиллоо. Томилогдсон даруйдаа тэр “Хүний хөгжил бол манай Засгийн газрын хамгийн том мега төсөл байх болно” хэмээсэн. (2025.06.13)

The MongolZ-ын тоглолтыг орон даяар хамтдаа үзлээ. Тэд өнөө цаг үеийн CS2-ын өнгийг тодорхойлж буй Францын "Team Vitality"-тай тоглосон юм. (2025.06.23)

3×3 сагсан бөмбөгийн “FIBA 3x3 World Cup 2025” тэмцээн Улаанбаатар хотноо болж, манай улсын эмэгтэй шигшээ баг мөнгөн медаль хүртлээ. (2025.06.29)

Япон Улсын Цог Жавхлант Эзэн Хаан Нарүхито, Эрхэм дээд Хатан Масако нар Монгол Улсад айлчилж Үндэсний их баяр наадмыг үзэн сонирхов. (2025.07.08)

Баянхонгор аймгийн Жинст сумын харьяат Энхтүвшиний Батмагнай ес давж, 76 жилийн дараа аймгаа төлөөлөн Монгол наадмын түрүүг авлаа. (2025.07.12)

Монгол Улсын ерөнхий боловсролын сургуулиудад 830 орчим мянган хүүхэд суралцаж байна. (2025.09.01)

"Оюут" шинэ ордыг нээлээ. Хайгуулын урьдчилсан үр дүнгээр 357 сая тонн хүдрийн нөөцтэй гэж тогтоогоод байна. Тус тооцооллоор авч үзвэл Оюут ордыг 30-35 жил ашиглах юм. (2025.09.07)

Цалингаа нэмүүлэхийг хүссэн багш нар хугацаагүй ажил хаялт зарлав. (2025.10.16)

Шинэ Ерөнхий сайдыг дөрвөн сарын дараа огцруулав. УИХ-ын 71 гишүүн дэмжсэнээр Ерөнхий сайд Г.Занданшатарыг огцрууллаа. Санал хураалтын дараа Ерөнхий сайд Г.Занданшатар дэд дарга Х.Булгантуяагийн ширээнд ирж, “За баярлалаа” гэж гар барихад хариуд нь, "Уучлаарай, ийм муухай саналаар хуралдаан даргалчихлаа" гэж гэмшингүй аясаар хэлсэн нь чуулганы шууд дамжуулалтаар сонстов. (2025.10.17)

УИХ-ын дарга Д.Амарбаясгаланг чөлөөллөө. Түүнийг чөлөөлөх тухай Төрийн байгуулалтын байнгын хорооны саналыг дэмжье гэсэн томьёоллоор санал хураалт явуулахад, хуралдаанд оролцсон 114 гишүүнээс 102 нь дэмжсэнээр УИХ-ын дарга Д.Амарбаясгаланг үүрэгт ажлаас нь чөлөөллөө. (2025.10.17)

Ерөнхий сайдыг огцруулсан үйл ажиллагаа нь Үндсэн хуульд нийцсэн эсэх маргааныг шийдвэрлэх Үндсэн хуулийн цэцийн их суудлын хуралдаанаар болов. Энэ үеэр УИХ-ын дэд дарга Х.Булгантуяа “Ерөнхий сайд Г.Занданшатар огцорсондоо уур нь хүрч Үндсэн хуулийн цэцэд хандсан байна” хэмээсэн. (2025.10.22)

Эмч нар цалингаа 3.5 сая төгрөгт хүргэхийг УИХ, Засгийн газар, Эрүүл мэндийн сайдаас шаардан жагсаал, цуглаан зохион байгуулав. Тэд тодорхой хариу өгөөгүй тохиолдолд ажил хаяхаа мэдэгдээд байв. Харин Засгийн газраас ирэх онд багш, эмч нарын цалинг нэмэгдүүлэх шийдвэр гаргасан юм. (2025.10.27).

Сүүлийн хоёр сар орчим Улаанбаатарчуудын амьдралын хэмнэлд нэг шинэ маршрут нэмэгдсэн нь шатахуун авах дараалал. Ажлаа тараад гэр лүүгээ түгжирдэг иргэд литр бензин авахын тулд шөнийн турш, зарим нь өглөө үүрээр түгээх станцын манаанд зогсох болов. Бид өнөөдөр ч шатахуун авахын төлөө дугаарласаар л…(2025.12.18)

Оюутолгойн бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэх зорилго бүхий нээлттэй сонсгол болов. Сонсголд Хөрөнгө оруулалтын гэрээг байгуулах үед Ерөнхийлөгч байсан Н.Энхбаяр, Ерөнхий сайд байсан С.Баяр, Үндэсний аюулгүй байдлын зөвлөлийн гишүүн байсан Д.Лүндээжанцан, Д.Дэмбэрэл болон Сангийн сайд С.Баярцогт тэргүүтэй хүмүүс гэрчээр дуудагдан 16 жилийн өмнө хэлсэн үгсээ эргэн санацгаав. (2025.12.22)